Li bajarê Silêmaniya başûrê Kurdistanê, welatiyê bi navê Enwer Bîrza 40 sal in pirtûk difroşe, ev 15 sale jî li kolana Şarê Salim a bajêr, pirtûkan digihêne pirtûkhezan. Bîrza dibêje ku ew karê pirtûkfirotinê ne ji bo qezenckirina pereyan dike û wiha got: “Xwendina pirtûkan ji bo zanîna mirovan gelekî girîng e. Ez tenê pirtûkan ji bo pereyan nafiroşim. Dibe ku kesek bê û ji bo xwendinê pirtûkekê ji min bixwaze, ez ê bêdudilî pirtûka ku dixwaze bidimê.” Di kulûbeya wî ya biçûk de li gel pirtûkên hunerî, wêjeyî û lêkolînan, kovarên cûr be cûr û rojname jî hene.
Enwer Bîrza bavê 5 zarokane û 14 salan wek pêşmerge li hember rejîma Sedam şer kiriye û di şerekî de ji milê xwe birîndar bûye. Her wiha 5 salan di zindanên Baasê de maye û rastî gelek îşkence û zextan hatiye. Li gel vê yekê jî ti caran dest ji tekoşîna azadiya Kurd bernedaye. Bîrza dibêje ku di dema pêşmergetiya xwe de jî pirtûk dixwend û wiha berdewam dike: “Ne şer û ne jî zindan li pêşiya pirtûkxwendina min nebûne asteng. Ez bi pirtûkan mezin bûm û bi pirtûkan re jî kal dibim.” Bîrza di derbarê elaqeya ji pirtûkxwendinê de jî wiha dibêje: “Xelkê Silêmaniyê ji xwendina pirtûkan hez dikin û rojane bi dehan kes tên û pirtûkan dikirin.”

Enwer Bîrza li kêleka pirtûkfiroştinê, wergerê jî dike. Heta niha 4 pirtûk ji erebî vegerandiye Kurdî. Bîrza ji qilûbeya xwe ya li kolana şarê Salim a Silêmaniyê ji kesên ku pirtûka hez dikin, dixwaze ku bên û pirtûkan ji xwe re bistînin. 



NEWROZ DIJWAR/ROJ NEWS/ SILÊMANÎ