Dewê ke girêdayeyê qezaya Licê ya Amedî de emser tarîxanê cîya-cîyayan de qedexeyê tebervejîyayîşê kuçeyan ameyî îlankerdiş. Qedexeyan ver dewijî nizdîyê 2 aşman nêşînayî keyeyê xo ra bivejyî teber. Bitaybetî demê peyênan de şar qedexe û operasyonan ver nêşîno zîret û heywankarîyê ke çimeyê debara înan o, bikero. Wextê operasyonî de 8 kesî bi wesayîtanê zirxinan ameyî qetilkerdiş û zaf kesî zî birîndar bîyî.
Tewr peynî qeza de bi beşdarbîyayîşê deshezaran polîs, leşker û qoricîyan operasyonêk dîyabî destpêkerdiş. Operasyon badê aşmêk bênetîce qedîya. Leşkeran seba ke netîceyo ke waştî nêgirewtî, dewijan tehdît kerd. Leşkeran dewijan ra vato ‘Teneyanê xo rew hewanê, ma do koyan hemînan biveşnî’. Dewijan nê tehdîdan rê reaksîyon damûsnay.
Ma nêewnîyaybî
Feyzî Kizildemîro ke dewa Hurê de maneno, wina va: “Operasyono verê cû de dewanê ma veng kerdî û kişta ma bombe kerdbîy. Nika zî ma çîyêko winasî reyde têrî manenî. Dewa ma de bi desan reyan qedexe ameyî îlankerdiş. Ê ma bikişî zî ma dewa xo nêteriknenî.” Gulden Kaplane zî va ‘bombeyan erzenî kişta keyeyanê ma’ û wina domnaye: “Wazenî bi no hawa dewanê ma veng bikerî. Ma cayo ke tede pîl bîyî ra hes kenî û ê se bikerî zî ma do tîya ra nêvejyî.”
Ez do tîya de bimira
Hanim Kuzuya 74 serreyî zî heta nika tim dewa xo de menda. Kuzuye va ‘wazenî bi top û hewanê ke operasyonan de erzenî, ma bitersnî’ û wina dewam kerde: “Dewa ma verê cû zî ameybî veşnayîş. Nika vanî ‘ma do reyna biveşnî’. Ma reyêk tîya terikna, labelê êdî ez bimira zî nêteriknena. Ma zimistanî Amed de manenî û ez nêşîna bivindera, ca de agêrena. Ez tîya de bîya û ez do tîya de zî bimira.” Jînda Kuzuye zî wina va: “Wazenî bi operasyonan dewan veng bikerî. Se beno wa bibo, ma do ca û warê xo nêteriknî û nêşêrî sewbîna ca.”
DÎHABER/AMED