Tay peyser şirê, la zaf nê. Teyna panc aşmî. Çiyê ke qewimyayî fikir bikerê. Çiqes mayî û pîyî bê keynay, bê lajî mendî. Çiqes domanî bê may û pî, çiqes heskerdoxî bê heskerdoxî mendî. Hona xorîn fikir bikerê, çiqes însanî bê war, rip û rût mendî.
Ya zî vinderê. Nê pêrokîn çîyan ca verdê. Tenya jû keynek fikir bikerê. Fikir bikerê ke jû keynek esta hewna 17 serrî ya. Jew resîmî de aysena. Tarîyî de şewq dayo rîyê ci û bereqîna. Rîyê ci hiwenok, çimê ci zey ke mijdanîya serkewtişekê danê ewnîyenê. Kam zano ke zerrîya ay de çiqes omidê girdî estbî. Wexto ke bî pîl waşt ke bibo resîmviraştox ya zî psîkolog. Rengarengî xeyalê ci estbî. Zey perîkeynayekê ciwyayişê ma ra vêrd ra û şî. A domana sifte yê ma û pîyê xo bî. Roşnîya çimanê înan, tîja keyeyê înan, gula ciwyayişê înan bî. Makîneya xo ya resîmantişî girot û zey pelpelikan perrîya şî. Waşt pêrokîn xasekîyan qeyd bikero. Nêzana ke emrê ay zî do zey pelpelikan hendayî kilm û nîme bimano. Kesî nêzana na perîkeyna hendayî wext şî kotî.
Çi heyf ke ma tenya bi merdişê ci ay pêhesna. Panc aşmî vindî bî Rozerîn. Zimistan vêrd ra, wesar ame, dar û gilan jîl da, teyr û tûrî ageyray halînanê xo la Rozerîn nêamê. Maya ci kuçe bi kuçe, tax bi tax kewt pey rêçanê keynaya xo. Wexto ke fehm kerdî no dişmeno zerrî tarî keynaya ci ganî nêverdayo waşt meyitê ci bigîro.
Reyna ageyrê û fikir bikerê. Jû keynek a 17 serrî bi guleyan ameya qişten û panc aşmî meyitê ci kuçeyan de, na quncik û a quncik de ternîya yo. Gelo Rozerîn panc aşman ra dima açarnîya çi rewşî? Goştê ganê ci esteyan ra rijîya gelo? Çimanê ci ra sebi? Maya ci û pîyê ci fikir bikerê. Meyitê ci zî ci rê nêdîya. Malbat tewr peynî de tenya waştişê esteyanê keynaya xo kerdî. Fikir bikerê ke jû malbatî verîya panc aşman mezeleyê domanê (qeçek) xo kerdo hadre. Kam na rewşî rê damiş beno. Encex kesê zerrî gird ê zey maya Fexrîye û pî Mistefa şenê na dejî rê damiş bibê. Ê hendayî zerrî girdî yê ke rixmê hendayî dejanê girdî keynaya xo bi sozê girêdayişê dawaya welatê xo emanetê Kurdistan kerdî. Na zerrî girdî û serberzî şinasnayişê dişmenê xo ra yena. Çike ê mezg û zerrîya tarî yê dişmenanê xo rind silasnenê.
Hewna cenazeyê bi desan keyne û lajanê welatê ma vindî yê. Esteyanê ci zî vêşî vînenê. Herbê qilêrîn hendayî bê sînor o. Çike yê ke no herbî ramenê wijdanê xo kerdê vindî û her xiravîn ferz kenê. Ma bodrimanê (cêrzemîn) wehşetî yê Cizîr kamcî mezg xo vîra keno. Ganî bi ganî veşnayişê însanan kam xo vîr ra keno. Yê ke hona zî dûştê na dewleta kiştox de serre nêwedarnenê wa maya Rozerîn dayika Fexrîye, maya Mehmet Tûnç Esmer Tûnç ra şerm bikerê.
Tenya istanika Rozerîn serva vervetişê na rejîma dîktatorîn bes û jêde ya zî. La enê dej û janî, wehşet û sûcî dê bê cewab nêmanê. Yê ke zerrîya bi hezaran mayan dejna dê bedelê ci zî bidê.