Dewleta Tirk her tim şarê Kurd bi kay û zûrriyan lete kerd û ard pêverd. Na dewlet sekerd? Jû finî şaran zey Alewi-Sunnî, Hanefî-Şafi-Malikî lete kerd, peycoy nê şaran kerd zey dişmenanê pê. Na dewleta qetilkar tayn cayan de zî nakokeya Kurd-Zaza akerd. Propagandayê siya-reş yê zey; “zazayî Kurd niyê” vila kerd. Hona zî tayn çormeyê zazayî bin tesîrê na propagandayê dewlet de mendiyê estê. Dewleta ke ‘Kurmancî gedexe kena, serva ‘zazakî’ tayn îmkanan dana. Na zî verra ‘zazakayan’ jû polîtîkayê da teybet a. Gerek şarê ma yê dimil-Kirdî endî destûr nêdê ke dewlet ser înan polîtîka biramo.
Weçînayinê 7’ê Hezîran’î de zî gerek şarê ma yê dimil sandoqan de îradeyê xo beyan bikerê û cewabê do rind bidê Erdoğan’ê dîktatorî. Çi ke Erdoğan zerarê do gird dano dîn, kiltûr û şaran. Gerek kes goş nêdo propagandayanê siya yê AKP. Na dewleta Romî tewr vêşî zirar zî da ma dimilan. Nayî ra gerek ma zî bi reyanê xo, bi îradeyê xo kay û komployanê na dewlet veng-tol vejerê û înşakerdişê sîstema xoser de rolê xo kaybikerê.
Dersîm; Hardê belekîn. Hardê Sey Riza, Besê, Zarîfe, Elîşêr û Sakineyan…Verra Dersim dewlet roja ronayina xo ra heta na roj pêrokîn polîtîkayê xo yê qilerîn ramit. Bombe rijna ser, sirgûn kerd, şikeftan de kerd axu, goç kerd, tecawiz kerd û terteleyê pîlî virast. Xo ra istanika Dersim’î herkes zono. Mesele naya ke; Dersîm nika çitûr cewab dano nê kerdisanê dewlete û partiya ke terteleyê ’38 viraşt? Partiya ki serverê ci dimpoçikê kiştoxanê Dersim, o ke eslê xo înkar keno? Nayî ra gune Dersîmijî ax û hewara Seyît Riza’yî erd de ca nêviradê. Heyfê domonê ki pîzeyê maya xo di amey singu kerdin, heyfê ceniyê ki xo kemeran ser ra eştî dolan, yê ki keyeyanê xo di amey veşnayen bigîrê.
Çewlig; Hardê Şêx Seyîd, Xeyrî Durmuş, Beritan, Gurbetelî, Karasûngûr û Celal Barak’an. Çewlig gerek na reynî zî xapînayiş, kay, komplo, def û dolabanê dewlet rê firset nêdo. Tarixa Kurdistan şahida ke, Çewlig heta nika ver dewlet teslîm nêbi, heta na roj xoverda. Çewligijî gerek pêrokîn hesabanê dewlet yê semedê Çewlig veng-tol vejê. Gune Çewligijî pêrokîn çeteyanê dewleta Romî, Hecî-Xocayanê ci yê zûrker biqewrnê û wayrê tornanê Şêx Seyîdê kal bivejyê.
Sêwereg-Hîlwan: Warê Necmettîn Büyükkaya, Cuma Tak’an. Hereketê serbestî yê Kurdan şert û mercanê zaf zehmetîn de Sêwereg de serhewada, sîstemê qoricî û yê dewlet qelişna. Rexmê dewlet, aşîretanê hemkarê dewlet, qoriciyanê ci destpa tekoşîn kerd û vilayê pêrokîn Kurdistan bî. Bi seyan keyney û lajekî tiya ra vejyay û xeylê ci goniya xo rijnay erdê Kurdistan. Nika zî, gerek Sêwereg-Hêlwan wayrê no mîrasê xo bivejyo.
Û Aldûş; cayê piyaciwyayişê şaran. Bi des serrano qezayê Semsûr Aldûş de şarê Asûrî-Suryanî, Ermenî, Tirk û Kurdî piya ciwyenê. Hewildayenê dewlet yê pêverardişê nê şaran pûç vejyay. La heta bîn ra, Aldûş bi serrano rîwalê polîtîkayanê dewleta derbekar hereketê serbestî yê Kurd ra dur mend. La nika wext ame. Endî Aldûş zî açaryeno raştiya xo. Senî ke bin banê HDP de pêrokîn şarî bi kamî, ziwan û raştiyê xo ca gênê se, Aldûş de zî dirûm wina-niya yo. Nayî ra Aldûş zî do 7’ê Hezîran de cewabê do raşt bido AKP ya zûrker û tiritox.
Çermug, Çüngüş, Erxenî, Pîran, Lice, Gimgim, Erzîngan, Mutkî û cayê bîn yê ke şarê ma yê dimilî-kirdî ciwyenê gerek weçînayinan de cewabê do rind bidê dewleta AKP.
Peynî-ameyişê dewleta faşistîn, hikumeta zurker do bi serkewtişê HDP bi reyanê şarî bîro ca. Destpakerdişê dewrê Kurdan û şaran destê ma de yo. Kam ke reya xo bido AKP do zilm, herb, gonî û kişkiş bivîno. La, kam ke tercîxê xo hetê HDP bikero do rojê rojnî, tîja sodirî bivîno.