Ma zanêy fekê ma kurdan şitî (Erdoganî û partîyê bînan) ra zaf veşayo. Her çiqas AKP têk şîya zî, zey qiseyê vernîyan; ‘maro birîndar har o’, yanê Erdogan û yê bînîy, birîndar û har êy, lazimo ma kurdîy verbê Erdogano dîktator û kargemarine ra, hefsa xo bikerime û hayîdarê kerdişê înan bibêy. Beno ke ney ra pey qirkerdişêy fermî nêkero û îlegal bikero! Beno ke kurdan û tirkan mîyan de fêsadeyeke zaf gird bivejo! Benoke provokasyonêy ke heta ney gamî nîyameyê ceribnayişî bikar bîyaro. Her çiqas ma kurdîy hefsa xo AKP, Erdogan û partîyêy bînan ra bikerêy se zî, ey hefzkerdişî ra aver ma kurdan ra tersenêy.
Vajîyeno; ‘ecelî ra tersayiş derman nîyo.’ Bîyo meseleya dîktatorêy tirkan. Semedo ke nêmirê tersa ke kurdan ra tersenêy bêfeyde yo. Çimkî têk şîyê û verbê hêza şaran de dîktatorîy merdişî ver de gan danêy.
Hefza ma oyo ke, gandayişî ver de zirar mereso şaran. Vanê ya; ‘Keso verbi xeniqyayişî de zereyê awî de mar zî bivîno, semedo ke mexeniqyo do xo bipêşo marî zî’ no hesabî ra, AKP û partîyêy bîn yê tirkan ke bê plan têgeyrayê û do têbigeyrêy û heme karêy xo heta ney gamî qirkerdişêy kurdan ra aver çîyeke nêkerdêy, ney ra pey de zî do hinî bikerêy û ewro birîndar birîndar ma mîyan de geyrenêy ke ‘firsendeke senî peyda bikerêy ke qirkerdişo zaf gird bikerêy’ dim de yê.
Pekî dîktatorîy çira kurdan ra hintayê tesenêy? Çimkî karêy ke heta ney gamî kerdêy heme karê gemarin ke kurdan qir bikerê ser yê. Zanêy ke kurdan siwend wendo do hesabê heme tewr qirkerdişan înan ra bipersêy. Weçînayişê 7’ê hezîranî yanê Roja Roşanê Azadîya Kurdan û Bindestêy Dinyayî destpêkerdişê têkberdişê dîktatorêy Dinyayî yo. Hemeyê serdestan weş fam kerdêy ke, kurdîy rayeke bîn tarîxî de medenîyetêy ke vila kerdêy bi zêdînê û no hezar serrî de zî bi pêla azadîya bindestan tarîxeke binuşnêy û vilayê Dinyayî û xozaya Dinyayî bikerê.
Tersa dîktatoran o yo ke, bi pêşengteya HDPa kurdan, arşîvêy dewletêy dîkatatoran, ke şarêy xo û yên bînan qirkerdêy, refêy tozgirote ra dosyayan bîyarêy war û dewlet bi dewlete hesabê qirkerdişan bêro persayiş o. No semedî ra, lazimo partîya dinyayî HDP rol û mîsyonê xo yê Dinyayî de giroto we weş bizano û zaf zaf baldar û hayîdarê xo û karûbarê xo bibo. Çimkî ewro HDP, bi saya 40 serrêy ke hêza şarê kurd şer kerda û bi saya dostêy înan, Dinyayî de bîya markayeke azadîya bindestan.
Dîktatorêy zey Saddam, Erdogan û partîyêy zey înan kurdan ra tersenêy, çimkî, do hesabê qirkerdişêy; Koçgirî, Gelîyê Zîlan, Ermenîyan, Dêrsim, Mereş, Sîwas, Çorim, Gazî, Şirnex, Amed, Helepçe, Enfal, Roboskî, Gezî, 5’ê hezîrana 2015’ê Amedî û hewna zaf qirkerdişêy bînan û hesabê helenayişê ziwan û kultirê kurdan do biderêy. Nêy semedan ra ewro çongê serdestan lerzeno û semedo ke kurdîy mohra xo mederêy hezar serra ke ma cuyenêy ra xebatêy gemarine dim de yê. La wa êy weş bizanêy ke hêza şaran ver de tu serdest nêvinderto û do nêvinderêy.
Ehmedê BIRA