Mîtîngê Aştîye ra Dayîkê Aştîye zî bi hêzo gird beşdar bibî. Şahîda Terteleyê Enqereye endama Însîyatîfa Dayîkê Aştî ya Stenbolî ra Ezîne Dal, terteleyê ser qise kerd. 


No dej nîno vîrkerdîş

Endama Însîyatîfa Dayîkê Aştî ya Stenbolî Ezîne Dal vat ke qet no tertele nîro vîrkerdiş, peynîya terteleyê zî polîsê AKPe hêrişê înan kerdî û çimkî kam no terteleyê viraşto se hetê AKPe yeno zanayiş û wina vat: “Ma seba mîtîngî heme şaranî ra kesî reyde rayîrî vejîyay, ma mîyanê otobusî de coş û heycan bîyî û her kes marşan vatînê. Ma demo ke ame Gara Enqereye bi hezaran kes seba aştîye kom bibî. Polîs çinîbî ma zî kêfweş bîyî, ma fikrîyay polîs hêrişê mîtîngî nêkero. Çimkî key ma aşkera bidaynê polîsê AKPe hêrişê ma kerdênî.”


Mîtîngê aştîyê ra heriş

Endama Însîyatîfa Dayîkê Aştî ya Stenbolî Dal dîyar kerd ke a verê teqyayişî nêrehetîya xo ser şîya hetê dole ronişta, demo ke a ronişta dîya ke her kes çikek kerdînê, gowend girewtînê û marş vatînê û wina domna: “Tam no demî vengê teqyayîşek ame û ona şîdetê teqyayişî gird bike zarê goşanê min zeyke teqîyay û tersî ra çimê min qefelyayî. Qey Mîtîngê Aştîye nê bombeyî teqîyay ez persena? Demo ke min çimê xo akerd, her ca de goştê merdimî estbî, kesekê ser lingan bîyê ser înan de zî goşt estbî. Min cuya xo de ona wehşetek nêeşnawitbî, no demî min embazekî ra qîra û min vat; Terteleyê Helepceye kiriştî Enqereye.”


Polîs û xokiştox

Dal aşkera kerd ke peynîya terteleyê qet ambulansan nêameyê raşteyê terteleyî, çi heyf ke peynîya terteleyî polîsê AKPe hêrişê birîndaran kerdî, hetta rîyê nê hêrişkaran tay birîndarî zî şehîd kewtî û wina dewam kerd: “Aşkera bike xeberê polîsan no terteleyî ra estbî, çimkî verê teqyayişê yew polîs daxî meydan de çinîbî. Polîsan hêrişê ma kerdî, destûr nêdayî ke ma hetkarîya birîndaran bikerî. Yanî bi aşkera ma qetil kerdî hem zî ma ra heqeret kerdî. Qet mîyanê xokiştox û polîsê AKPe de ferq çino. Heme dayîkan mîyanê şokî de bîyî û qiraynî. Dayîkê Aştîye waştînê vengê xo ya aştîwaştişî dinyaye ra bidê hesnayişî. Ma hetanê peynîye do waştişê xo yê aştî biqîrî û dinyaye ra bidê famdayişî.”  


Senî beno paytext de bombe  teqîyeno?

Dal bal ant ser vatişê serekwezîrê Davutogluyî yê ‘Lîsteya bombekaran destê ma de esto labelê ma nêeşkenî înan bitepişî û no dergî da qise xo: “Aşkeraya ke no terteleyî de engiştereya AKPe esta. DAIŞ fekê AKPe ra ewnîyena. AKP çi vaja se DAIŞ kena. Eke xeberê AKPe çino se senî zereyê qelebelexî de yew polîs daxî çinêbî. Qey taybetê mîtîngê HDPe de bombe teqîyenî. Qey mîtîngê partîyê bîn de bombeyî nêteqîyenî. Senî beno paytexta to de bombe teqîyeno û xeberê to çino?”  


 JINHA/STENBOL