HALÎT ERMÎŞ / ANHA / KERKÛK
Vera kurdan de planê tasfîye erzîyayo dewre. No bi hawayo zelal û aşkere yo. Teslîmkerdişê Kerkûkî tena parçeyêka nê planî yo. Gelo no konsept çira erzîya dewre, kamî tede ca gênî û amancê înan çi yo?
Nika ra 20 rojî verê PDKyî vatêne ‘ma referandumê xoserîye virazenî’ û xo sey xelaskarê neteweyî yê kurdan nîşan dayêne. Barzanîyî vatêne ‘eke lazimî bibo, ez do Kerkûk bipawa’ û bi çimê Qudsî Kerkûk ra ewnîyayêne. Labelê ameyîşê Heşdî Şabî ra ver hukmatê Hewlêrî û PDKyî hêzê xo bajarî ra antî. Tena gerîlayî ewja de xover dayî.
Goreyê konsepto ke vera kurdan de erzîyeno dewre, hêzê herême vera kurdan de bi her hawayî planê hêrişan kenî. Tirkîya û Îran referandûm ra ver bi hawayo ortax tatbîqato leşkerî viraştî. Hukmatê tirk Astana de tena Başûrê Kurdistanî nê, Efrîn zî tehdît kerd û hetta bi dagîrkerdişê Idlibî nê tehdîdan eşt pratîk. Heto bîn ra ser medyaya komelkî ra derheqê ewleyî û weşîya Rayberê Şarê Kurd Abdullah Ocalanî de xeberî ameyî parekerdiş. Dewleta tirk zî zana ke şarê kurd tewr zaf hetê Ocalanî de hesas o. Bi hawayo qestî Ocalan dekerdî merkezê nê konseptî û hesabê xo no gore kenî. Reyna dewleta tirk hêrişê Warê Pawitişî yê Medya kena. Ewja de zî gerîlayî xoverdayîşêko tarîxî nîşan danî. Heme cîhan vîneno ke gerîla senî derbeyanê girdan dano dewleta tirkî ro.
Wazenî se bikerî?
Herême de DAIŞî ra dima wazenî Syces-Pîcotêko newe reyde kurdan teber de biverdî. Goreyê no konsepto newe, wazenî heme qezencanê kurdan bihelênî û seba sînoran mase ser de ronîşî. Eke vera nê konseptî de sîyasetêko raşt û ortax biameyêne kerdiş, nika wina nêbîyêne. Labelê çi heyf ke polîtîkaya şaşe ya PDKyî bi destê xo kurdan teslîmê dişmenan kena. Lazim o nika bi hawayo baş hesab bêro kerdiş, nika ra pey do se bibo û goreyê ci do çi tedbîrî bêrî girewtiş. Hetê kurdan de rewşe 2 rojî yo ke resaya dûştêko tehlukeyin. Seba na rewşa tehlukeyin ra xelisyayîşî, ganî sîyasetêko raşt bêro kerdiş û ganî hêzê pawitişî yê ortax bêrî awankerdiş.
Ganî hukmatê Başûrî hesab bido
Ganî hukmatê Başûrî bi hawayo lez dîyar bikero ke çira xeta Kerkûk-Germîyan û Şengalî nêpawit û teslîmê Heşdî Şabî û artêşa Iraqî kerd. Seke yeno zanayîş, Neçîrvan Barzanîyî verê cû Şengal de PKK sey hêzo dagîrker nîşan dabî. Nika yewna rey Şengal caverda û remayî, do se vajî? Ganî hukmatê Başûrî nika aşkere bikero, pey perdeyî de çi esto? Eke orte de bazarêkî çinêbo, o wext çira pêşmergeyî qet xover nêdayî û xo tepîya antî? Berpirsîyarê nê kam o?
Reyna teslîmkerdişê Kerkûkî ra ver Dukanê Silêmanî de PDK û YNK kombîyayîşêkî viraştî, o kombîyayîş de çi ame qiseykerdiş. Ê kombîyayîşî de kamcîn qerarî ameyî girewtiş? Eke hêzê Başûrê Kurdistanî wazenî çimê şarî de xo pak bikerî, ganî cewabê nê persan bidî. Neke do tarîx no sey îxanet şinase bikero.