AXÎN TOLHILDAN / ANF / RIMELAN
Tevgerê Komelê Demokratîke (TEV-DEM) ke 16ê Çileyê 2011î de awan bî, seba averberdişê komelê polîtîk û ehlaqî kongreya xo ya 3. pê ard. TEV-DEMî heta nika xeylê dezgeyê demokratîke aver berdî û komun û meclîsanê taxe, bajar, ziqaq û dewe awan kerdî.
Endamê Komîteya Têkilîyanê Teberî ya TEV-DEMî Salih Muslîmî kongre ser o qisey kerd. Muslîmî dîyar kerd ke TEV-DEMî heta nika xeylê warê sîyasî û sosyalî awan kerdî û wina domna: “Labelê ma do na kongre de na rewşe bibedilnî. Çimkî şertî bedilîyenî. Şertê nikayînî cîya yî. Nika warî zaf hîra bîyî û hetanê bînan ra xeylê kesî beşdar bîyî. Ma do na kongre de xo newe ra eyar bikerî û ma do biagêrî wezîfeyê xo yê esasî ser.”
Muslîmî dewamê qiseykerdişê xo de wina va: “Vîyarte de xeylê war û îdareyî ameyî awan kerdene. Rolêko winasî yê TEV-DEMî estbî. Nika zîhnîyetêko winasî vejîyayo orte ke seke TEV-DEM îqtîdarî temsîl keno. Helbuk wina nîyo. TEV-DEM qet nêbeno îqtîdar. Cok ra kongreya 3. muhîm a. Verê zî mîsyonê TEV-DEMî eynî bi. Nika rewşe bedilîyena. Awanbîyayîşê TEV-DEMî de kurdî rayberî kerdî, labelê şarê bînî yê Sûrîye ra zî beşdar bîyî. Xora ereb û suryanîyî xo rêxistine kerdî û beşdar bîyî. Seba ke komel hîna zaf aktîf bibo, ganî xo rêxistine bikero. Komelo rêxistinbîyaye, eşkeno heme çî bikero.”