21ê teşrîna verêne de Serekê Karê Dîyanetî Alî Erbaşî Cemxaneyê Tuncelî zîyaret kerdbi û ewja de îzehetê xo de qala tayînkerdişê îmaman yê cemxane rê kerdbî. Sereka Şûbeyê Kartalî yê Komela Kulturî ya Pîr Sultan Abdalî Songul Tunçdemîre qisey kerde û vera vatişanê Erbaşî de reaksîyon nîşan daye.
Tunçdemîre va ‘vatişê winasî manîdar î’ û wina domnaye: “Wexto ke Dêrsim yeno vatene, ewil elewîtîye yena vîrê merdimî. Polîtîkayê ke tewr zaf texrîbat viraştî, Dêrsim de ameyî domnayene. Qetlîyamê Dêrsimî dewam keno.”
Tunçdemîre dîyar kerd ke cemxaneyan rê tayînkerdişê îmaman yeno manaya henekê xo bi elewîyan kerdene yo û wina va: “Hukmatî bi nameyê tayê komxebatî viraştbî û no vatene zî wina aseno ke netîceyê înan de vejîyayo. Verê cû qala erşawitişê pîran yê hecî kerdêne, nika zî qala tayînkerdişê îmaman kenî. Çiqas waştişê ma zêde benî ê zî hîna zaf Dîyanetî aktîf kenî. Ganî Dîyanet bêro padayene. Ma do têkoşînî xo ra fek veranêdî.”
Tunçdemîre bi wesîleya serrgêra 81. ya şehadetê Seyîd Riza û embazanê ci de zî qisey kerde û wina qedênaye: “Senî ke wexto ke serrgêra Qetlîyamê Sêwazî nizdî beno, yan zî Qetlîyamê Gurgumî nizdî beno, rojevê cîyayî yenî awankerdene, nika serrgêra Seyîd Rizayan de zî rojevê cîyayî yenî awankerdene.”
PÎRHA / STENBOL