Tezkera 2îne gurete. Bravo!                 Naye ra avê zî jû tezkera xo biye. Verva kurdan. Başur de.
Nika jûna gurete. Onca verva kurdan. Na raye rojavade.
Mordemekî zaf baqil yê. Se kenê, wastena xo anê hurendî.
AKP demê hostayenî rast ke rind gureynena, hostayenya xo misnena homete.
Hometa henena ke qe mevazê.
AKP kuna ra NATO ver mislimanan kisena, hometa mislimanan bena sa. AKP jê rayberê xo qebul kena, na hometa mislimanan.
Nika tezkera ke gurete, rastiye de verva Suriye niya. Na tezkere verva kurdanê rojavayî meclîsa tirk ra vejiye.
Eke verva Suriye jû tezkerê biwastenê, 22ê hezîrane ra dime wastenê. Çike, a roze Suriye jû teyara tirk day bî waro. 2 pîlote tirkî kişay bî.
Eke verva Suriye tezkere biwastenê, na biyayîs ra dime wastenê. Hama armancê hukumatê AKP no nêbî.
Hata tezkere guretene ra tepiya sermiyanê hukumatî vanê; “Ma seweta herbî tezkere nêgureta, seweta tersnayene gureta!”
Hama heto bîn ra hometa Tirkiye herb rê bena amade. Çapemeniya tirk leto jede dowilanê herbî cinena.
Rojnamevanê tirk onca hukumat û netevê xo goynenê. Serokwezîro tirk cîranunê Tirkiye tehdît keno.
Heya! Kam se vano va vazo, na tezkere verva kurdanê rojavayî ama guretene.
19ê temuze ra na het kurdî rojava de xoseriya demokratîk înşa kenê. Hedefê dewleta AKP xoseriya demokratîk yê kurdan a.
Tabî na nêna o mane ke, Tirkiye verva Suriye tewa nêkena. Kena.
Hama derdê hukumatê AKP çerxê kurdan çitur kena xirave, rojavayê Kurdistanî çitur cena binê bandira xo, na yê.. Suriye de çiyo ke AKP nêwastenê o bî. Kurdan rê xoseriya demokratîk era xo vîrî nêardenê, hama tam na biye.
Jû dewleta ke kurdanê bakurî bi hezaran kena hepis, Roboskî de tertele kena, seweta tarîxê xo yê qilêrin û pirrê qetlîaman, kurdan ra lêborîna xo nêwazena, herhalde rojavayê Kurdistan de xoseriya demokratîk yê kurdan rê sanêbena.
Çi beno bibo, bakur, başur, rojava kurdî gune hayîg vinderê. Na demde linga kamî ke xişt biye, o vêseno.
***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.