Endama Meclîsê Partîya CHPyî Gulseren Onança ke Mîyanê Grûba Dîyalogî de ca gêna, derheqê referandûmî de qisey kerde û vînayîşê xo arde ziwan.
Onançe qiseykerdişê xo de dîyar kerde ke ‘Tirkîya de demokrasî binê rîskêko pîl de ya’ û qiseykerdişê xo wina domnaye: “Wextêko winasî de amadekarîya referandûmî yeno kerdiş, ma do sey merdimê ke têkoşînê azadî, demokrasî û seyyewbînanî danî, ma do nê pêşnîyazê bedilnayîşê qanûno bingeyî red bikerî. No proses de yê ke kampanyaya ‘nê’ meşnenî, sey ‘yê ke welatê xo ra hes nêkenî’ yenî şinasekerdiş. Labelê ma do nê hesabê îqtîdarê AKP û MHPyî xira bikerî.”
Meşrû nîyo
Onançe va ‘Hemserekê HDPyî bi hawayo tewqîfkerde yenî mehkemekerdiş û no nîno qebulkerdiş’ û dewam kerde: “Wexto ke îdarekarê HDPyî heme tewqîfkerde yî de bedilnayîşê qanûno bingeyî meşrû nîyo. Mehkemeya Qanûno bingeyî wezîfeyê xo nêana ca. Wexto ke no pêşnîyaz ser o meclîs de ameyêne munaqeşekerdiş, o wext îdarekarê muxalefetî meclîs de nêbî. ”
Ganî ma bixebetyî
Onançe peynîya qiseykerdişê xo de wina va: “Ganî ma bi hawayo baş prosesê referandûmî kesê ke bêqerar î ra vajî. Ganî ma Tirkîya ameyoxe de do bi çi reyde rî bi rî bimana, şarî rê bidî famkerdiş. Nêyî zî yê ke verê cû reyê xo dayî AKP û MHPyî û dima ra nê partîyan ra kewtî şik î. Yanî yê ke nê prosesî fam nêkenî, estî. Ganî ma seba qezençkerdişê nê hetan bixebetyî. Ewro eke temsîlkarê ke hetê şarê kurdî ra ameyî weçînayîş, meclîs de nêbî, ma do kamî reyde aştîye bivirazî. Ez nêyî raşt nêvînena, şima nêeşkenî şarî ra zî bivajî. Şima şarî ra vanî ‘ez temsîlkaranê şima tewqîf kena, la reyanê xo bidê mi, ez do aştî bîyara.’ No xapênayîş o. Ti kes qebul nêkeno.”
DÎHABER/MÊRDÎN