Nêweşxaneyê Dewlete yê Şirnexî ke verê cû xeylê sebeban ver amebî rojeve, nika zî kesêkê seba ke Kurdî qisey kerd, raştê heqaretî ame. Ame musayene ke pisporê Welidîyayîşê Cinîyan G.Dya ke nêweşxane de wezîfedar a, heqaretê kesê ke mîyanê xo de kurdî qisey kenî.
Cinîya ke ewleyîye ver nameyê xo nêdaye, qala hedîseyî kerde. Cinîye va ‘dayîka mi kurdî zana, labelê seba ke tirkî nêzanayêne, mi waşt ez aye reyde şêra’ û wina dewam kerde: “Wexto ke doktore eşnawite, hêrs bîye. Doktore va ‘senî tirkî nêzana, mecbur a bizana’ û heqaret kerde.”
Cinîye dewamê qiseykerdişê xo de wina va: “Wexto ke cinîya ke hetê doktore de xebitîyayêne, ma reyde kurdî qisey kerde, doktore heqaretê aye zî kerde û aye ode ra vete. Verê cû çend kesan rê no ame kerdene û hîna zî yeno kerdene. Ganî vera nînan de çîyêk bêro kerdene. Merdimî seba ke baş bibî şonî ewja, labelê raştê heqaretî yenî.” Reyna ame musayene ke kesê ke nasname de cayê welidîyayîşê înan rojawan o rê torpîl yeno kerdene.
MA / ŞIRNEX