Badê ke Zîndanê Tîpa Tyî yê Osmanîye de zext û zordarîyî zêde bîyî, Serekê Komîsyonê Şopnayîşê Zîndanî yê Baroya Edene Tugay Bek zîndan zîyaret kerd û derheqê zext û tedayan de raporêk amade kerd. Bek zîndan de bi Hemserekê Şaredarîya Qereyazi ya Erziromî Mehmet Saît Karabakan, Akar Îkbal û M.Faruk Engînî reyde pêvînayîş kerd.
Bekî çîyê ke Karabakanî cuyayo, fekê ey ra wina ard ziwan: “Mi 9 reyan krîzê zerrîye vîyarna û nika 8 hebî stendî damaranê mi de estî. 4 reyan qelbê mi vindeto. Nika qelbê mi se ra 65 kêmî yo, qîm nêkeno. Edene, Osmanîye û Gurgum de mi erşawitî nêweşxane, la çîyêk nêame kerdiş. Nêweşxaneyan de kelepçe reyde tedavîya ma kenî. Eşyayî nêdîyenî ma û waştişnameyê ke ma erşawenî, ma nêzanî ka resenî muxatabanê xo an nê. Pêvînayîşo akerde nika 2 aşman de reyêk yeno viraştiş, 3 hewte yo ke ma nêvejîyayî spor. Koguşê 10 kesan de 18 kesî manenî, şewe saetanê ereyan de seba ke provokasyon bivirazî, sehnayîşan kenî. Koguşan de kamerayî ameyî bicakerdiş. Rojnameyê Cumhurîyet, Evrensel û Ozgurlukçu Demokrasî nêdîyenî ma.”
Nêyî terorîst î
Bekî dewamê qiseykerdişê xo de qala pêvînayîşo ke M. Faruk Engînî reyde kerdo zî kerd û wina va: “Engînî mi ra va wexto ke ez ameya tewqîfkerdiş, birîndar bîya. Wexto ke ez ameya tepiştiş, mektebêk de îşkence bi mi kerdî û sole dîya birîna mi ro. Dayî birîna mi ro û cayê ke amebî deştiş, deşteya ci teqnayî. Dima ra mi berdî Mêrdîn û ewja de zî îşkence dewam kerd. Mi ewja ra ardî Zîndanê Osmanîye. Wexto ke mi berdî nêweşxane, cendirmeyan ewja de vatî ‘nê terorîst î’ doktor tedavîya mi nêkerd. Seba ke tedavîya mi nêame kerdiş, ez nika nêşêna linga xo têbida.”
Doktorî îşkence kerd
Bekî qala pêvînayîşo ke bi Akar Îkbalî kerdbî, kerd û vatişanê Îkbalî fekê ci ra wina va: “Ez 26ê gulana 2016 de Nisêbîn de tepişîyaya. Ez wexto ke ameya tepiştiş, birîndar bîya. Salonê Sporî de îşkence bi mi kerdî. Doktorî mi ra va ‘ti terorîst î, ez to tedavî nêkena’. Hetta polê min şikite tada û îşkence bi mi kerd. Mi zîndan de berdî Edene û Osmanîye, labelê tedavîya mi nêameye kerdiş. Her ke ma şîyî nêweşxane, leşkeran doktorî ra va ‘nêyî terorîst î, Nisêbînî ra ameyî’, doktoran zî vatêne ‘ti terorîst î’ û tedavî nêkerdî.”
1 serre yo ke îdîaname çin o
Bekî tewr peynî va ‘seba ke polê Îkbalî bi hawayo şaş girîyayo, destê ci yo çep seqet mendo’ û wina qedêna: “Îkbal û Engîn yew serre yo ke tewqîfkerde yî, labelê heta nika îdîanameyê înan nêameyo amadekerdiş. Heta nika avûkatêk daxî înan zîyaret nêkerdo. Ma do derheqê nê muameleyê ke hepsî têrî mendî de malumat bidî Wezaret, Dozger û Meclîsî û dima ra zî ma do taqîp bikerî. Se beno wa bibo, heqê cuyayîşî esto, nê kesî tewqîfbîyaye yî û ceza nêdîyayo înan. Ganî heqê înan yê tedavî bêro ca. Muameleyê winasî nînî qebulkerdiş.”
DÎHABER/EDENE