Herkes ser xoverdayîşe Cizîr û Amedî qisey keno. Rayedarê dişmenî R.T.Erdogan û Ehmed Dawidoglî vanê, “Ma kok û ristime şarê kurdî qelnenî. Ma şarê kurdî qirkenî. Beyntarî de mendiş nêbeno. Gera herkes hetê ma, hetê dewlete ma bigero.”
Erdogan û Dawidoglî hina dorme her kesî gênî, kam medyaya sosyalî de zî yew rexne bikero, derheqê eyê de mehkema akenî, tepişenê û erzenê zîndan. Bi hezaran akademîsyenan vatî, ‘Kurdistan’î de şer esto, ganî AKP-TC komkiştenan ra fek verado. Polîsî yew bi yew erzenî keyeyanê înan ser û benê mehkema kenî. Tayî înan karî ra ameye eştiş.
Dewleta Tirk hina kena ke, nêverdana yew nefesekê rind bigîro. Kam ke dewlet het de ca nêgîno, zey neyar (dişmen) vînenî. Destê dewlet ra çi yeno, hemverê înan kena. Xora Ehmed Davudoglî eşkera vano, ma keye bi keye, yew bi yew şarê kurdî kişenê. Dewleta Tirk pê (bi) nê heşî (zihnîyetî) Cizîr de yew bi yew birîndaran (dirbetinan) kişena. Nêverdana ambulansî zî şîyerê birîndaran wedarnê û biberê nêweşxane.
Dewleta Tirk pê tanq, top û dozeran bajaranê (sûk) Kurdistan xirab kena. Keye bi keye rijnena. Ti şerekê (lej) de çîyê do hina nêameyo dîyayîş. Surîye de Esad’î hina nêkerdo. Saddamî çîyo hina nêkerdibi. La Erdogan û Davudoglî kenî. Ser Kurdistan qirkerdiş ramenê. Vanê ‘Ma yew kurd nêverdanê’, la reyna tayî kurdî vanê ‘se bibo’? Tayî kurdî zî vanê ‘wisar tayî mendo, wisar bîyero gerîla zî vejîyeno meydan’. Tayî zî qiseykenê vanê ‘çira metropolan de bêvengî esta’? Ayê ke hina qisey kenî, binî de xelet fikiriyenî. Esasî de vanê, ‘ma teber de vinenê, wa şarê kurdî ayê bîn têkoşîn bikero, ez xora seyrbikerî hele sebeno’. Tayî zî bi nê qiseyan wazenê xo têkoşîn ra dûr bigerenê û rehetîya xo xirab mekerênê. Ayê ke hina fikiryenî vanê ‘wa Kurdistanekê azad roniyo, labelê wa pê ked, bedeldayîşê kurdê bîn bibo’. Tayî kurdî vanê, ‘hele wa wisar bîyero, o wextî gerîla zî çalakîya bikero, rind beno’.
Ayê ke hina vanê, qey zonayişê înan qiseykerdişê Erdogan û Dawidoglî ra çino? Ayê ke hina vanê, qey hayîyê înan qiseykerdişê KCK ra zî çino? Erdogan û Dawidoglî înan vanê, ma heta wisar xoverdayîşê şarê kurdî binvisnenê. Yane nêvanê ma heta wisar vindenê. Planê înan hina yo ke, hata wisarî qirkerdişê xo bikerenê. KCK zî seba no plan û qirkerdişê dewleta tirk hîşyarî da pêronê şarê kurdî û vat, gera yew kurd zî bayîye wisar nêvindero. Kam se keno, wa nika bikero.
Yanî têkoşîn de wisar-misar nêmendo. Kam zimistanê de zî têkoşînêk pêt bikero, o serkewno. Gera şarê kurdî hina biewnê û yew deqîqe zî here (berey) nêmano.