Yewîya Ewropa (YE) ra derheqê netîceyê referandûmî de îzehet ame dayîş. Raportorê Ewropa yê Parlamentoya Ewropa Katî Pîrîye verê hesabê xo yê Twîtterî ra dima ra zî îzehetêko nuştekî daye.
Pîrîye îzehetê xo de va ‘seba heme demokratê ke Tirkîya de yî, rojêka dejin a û netîceyê referandûmî yeno manaya erjanê Ewropa ra qerfîyayîşî’ û îzehet wina domîyayo: “Tarzê Erdoganî yo otokratîk komelê Tirkîya mîyan de cîyabîyayîş viraşto û zirar dayo ekonomîye. Eke paket nêro bedilnayîş û bierzîyo dewre, o wext do müzakereye Yewîya Ewropa biqedyî.”
Tirkîya nêşêna bikewa Yewîya Ewropa
Dewamê îzehetê Pîrîye de wina ameyo vatiş: “Tirkîya de şert û mercê nêadilan de nufûsê Tirkîya bi ferqêko şenik selahîyeto bêdenetîm dayo Erdoganî û piştî dayo paketêko otoriter. Na roje seba demokratanê Tirkîya rojêka dejin a. No welat de eke cîyayîya qewetan rê rêze nêro nîşandayîş û mekanîzmaya kontrolî çinêbo, no welat nêşêno bikewo Yewîya Ewropa. Netîceyê nê referandûmî yeno manaya erjanê Ewropa ra qerfîyayîşî. Xora verê cû Erdoganî tayê lîderanê Ewropa bi sucanê Nazîyan sucdar kerdbî û no zî zirarêko pîl dabî Tirkîya. Ez do kesê ke seba heqê bingeyî û demokrasî şer kenî, hetê înan de biba. Ewro vejîya orte ke Tirkîya de bi mîlyonan kesê ke erjanê Ewropa wazenî û pare kenî estî û ganî YE beranê xo înan rê nêpado.”
DÎHABER/AMED