Hewteyo verên operayonê Mûsilî dest pêkerd. Qasê 2 serrîyo ke bajarê Mûsilî destê çeteyanê DAIŞî de yo. Çeteyan 10ê hezîrana 2014 de Mûsil îşxal kerdibî û o wextî ra nat bi hewayo kovane uca îdare kenê. Wexto ke çeteyan dest rona Mûsilî ser heme dewletî temaşe kerdî. Artêşa Iraqî mîyanê Musilî ra rema û teslîmê çeteyanê kovîyan kerd. O wext Walîyê Mûsilî Abdullah Nuceyfî bi. Nuceyfîyo ke o wext Mûsilî teslîmê çeteyanê DAIŞî kerd nika dostê hukmatê Tirkîya yo. No merdim nika serekê Hêzanê Haşdî Watanî yê ke Başîka de hetê Tirkîya ra yenê weykerdiş o. Tewr peynî Hukmatê Iraqî derheqê nê merdimî de qerarê tepiştişî vet. Sebebê nê qerarî zî no yo ke no merdim Tirkîya de ortaxî keno. Walîyê Musilî Abdullah Nuceyfî bi xo zî sûnnî yo û ez bawer kena ke bi destê xo Mûsilî teslîmê çeteyan kerdo. Nê organîzasyonê sûnnîyan pêro zî yew çime ra weye benê û zîxnîyetê înan yew o. Heme zî dewamê zîxnîyetê Seddam Huseyînî yê. Xora no merdim zî tereftaranê Seddamî yê verênan ra yew o. Mûsil yê kamî yo.? Her tim ser o yeno qiseykeridiş. Çira musil hende qiymetin o.? Tena semedê kurdan, tirkan, ereban û eceman ney, Mûsil semedê pêrune dinya muhîm o. Tay kesî vanÊ ‘ Mûsil ser o do herbê dinya yo hîrêyîn dest pêbikero.’ Mûsil yew sebeb o û hêzê emperyalîs Musil ser o hîna zêde Rojhilatê Mîyanênî kenê têmîyan û waştişanê xo anê ca. Waştişê înan yo esasî petrol o. Semedo ke petrol ser o şaranê xo bikerê zengîn dest erzenê erdo nê erdan.
Eke yew ca de demokrasi û edelet bibo hêzê emperyalîsî nêeşkenê wina bikerê û bibê serdest. La eke yew ca de zulum û neheqî bibo karê înan rehet beno û her tewir bi teşeronanê xo uca kenê têmîyan. Rêxistina DASIî zî ê teşeronan ra yewêk a. DAIŞ pê qetlîam û kovîtîya xo xeylê zerar da Rojhilatê Mîyanênî. Nika zî hêzê emperyalîstî û dewletê ke ortaxê înan ê Mûsil ser o kewtê yewbînan û her roj stratejîya xo Mûsilî ser o kenê. Tabî mesela tena Mûsil nîya. Meselaya esasî pêroyê Iraq û Surîye ya. Xora aye ra DAIŞ nê welatan de bîyo qewetin û her di welatan de xo rê yew bajar kirewto û îdare keno. Ê bajarî zî Mûsil û Raqa yê.
Operasyonê Musilî bi beşdarîya Pêşmerge û hukmatê Iraqî dest pêkerd. Rêxistina Haşdî Şabî ya ke dewleta Îranî temsil kena ra qismêk no operasyon de ca girewt, la hêzê ke Tirkîya Başîka de wey kerdê operasyon de ca nêgirewtî. Hukmatê Iraqî destûr nêda înan û Tirkîya ra zî waşt wa heme leşkeranê xo Başîka ra peyser bianco. Hukmatê Tirkîya zî hêrsê xo nişan da û va ‘ Ma do semde Mûsilî plananê xo yê B û C bierzê falîyet’ Serekwezîrê tirkan bi aşkera va ‘ Mûsul erdê ma yo.’ la hetanî nika hêzê girêdayîyê Tirkîya Operasyon de ca nêgiretî. Tayî vanê Tirkîyaya ke her tim hetê çetayanê DAIŞî kena wazena serekanê çeteyanê DAIŞî zerê Musilî ra bixelisno. Çimkî Tirkîya pê nê çeteyan hêrişê kurdan kena û kena ke wa kurdî azad nêbê û her tim sey kole biciwîyê. Tirkîya aye ra nêverdena wa YPG, PKK, YBJ ne Mûsil ne zî Raqa de mîyanê azadkerdişê nê bajaran de ca bigîrê. Tirkîya qayîla wa hêzê YPG Minbicî ra zî vejî. A bîne zî Tirkîya hema zî Rojhilatê Mîyanênî de mehzebê sûnîtî ser o sîyaet kena û wazena serekîya dewletanê sûnîyan bikera û biba serwer. Suudî erebîstan, Kuveyt û katar dostê Tirkîya yê esasî yê. Ma eşkenê vaje Tirkîya û dewltê ke înan de bîya ortax û hêzê bînî her roj Rojhilatê Mîyanênî de şer kenê. Ewro Mûsil ser, meşte Raqa û di siba cayêko bîn…
Îran Sûrîye, Misir û dewletê bînî heto bîn de ca gênê. La çi heyf ke wayîrê înan pêro zî yew hêz o. Hêzê emperyalîsî ge o hêz verdenê o bîn ge zî o hêz. Tîya de ortaxîya nê dewletan pêro zî dişmenetîya kurdan ser o awan bena. Aye ra kurdê ke roja ma ya ewroyîne de hem hetê leşkeri û hem hetê sîyasî ra bîyê wayîrê qewetêko pîl leza lez fek heqanê xo ra veranêdanê û bi hewayêko aktif seba azadîya xo şer kenê. Ma ganî na raştî xo vîrî ra nêke. Rojhilatê Mîyanênî de dostê saddamî yo esasî Tirkîye bî. Semedo ke Saddam vindî kerd kurdî tay bo zî helmêko rehet girewt. Nika Saddam çin o û Tirkîya bîya serkeşê sûnnîyan. Mûsil semedê sûnîyanê ereban zaf muhîm a û semedo ke wa şîîyî û kurdî uca de nêbê serdest çi destê înan ra yeno kenê. Aye ra Tirkîya hende bîya har û hêzanê emperyalîstan ra wazena wa leşkere tirkan zî operasyon de ca bigîrê. Nîyetê Tirkîya hol yan zî azadkerdişê Mûsilî nîyo. Tirkîya û destegdarê aye nêwazenê wa sûnîyê ereb gonî vindî bikerê û şîîyî û kurdî bibê qewetin. Tirkîya bîya mehkumê sûnîyanê ereban. Çimkî çend serrîyo ke pereyanê înan wena. Nika pereyi qedîyenê, sûnîyê ereb gonî vindî kene. Dem zî demê averşîyayîşê kurdan o. Tena wa kurdî bieşkê mabênê xo de yewitîya xo ronê. Dişmenê kurdan ortax ê. Ma hêrişê çeteyanê DAIŞî yê Kerkukî de dî. Çeteyî sernêkewtî. Çira? Çimkî sey her wext şervanê solsûrî resayê hewara Kerkukijan înan.