Teşebusê derbe ra dima bi îlankerdişê rewşa îstîsnayî (OHAL) xeylê neheqîyî ameyî kerdiş. Tepiştiş, tewqîfkerdiş, kiştiş û karî ra dûrîvistiş û sewbîna. 15ê temuze ra nata Tirkîya de hem hetê sîyasî û hem zî hetê ekonomîk de krîzêko gird yeno cuyayîş.
Serekê MAZLUMDERî yo kehen û Verfekê Platformê Aştî ya Kocaelî Dr. Omer Faruk Gergerlîogluyo ke bi Qerarnameyê Hukmê Qanûnî wezîfe ra amebî îxraçkerdiş, derheqê tehlukeyê ke vernîya Tirkîya de yî de qisey kerd.
Gergerlîogluyî va ‘Tirkîya ver bi aramî û başî ra nêşona’ û qiseykerdişê xo wina domna: “Wazenî komara tersî awan bikerî. Cok ra bi polîtîkayanê xo heme muxalîfan kenî hedef. Nika mîyanê komelî de kaos û krîzêko gird esto. Serra 2016 de hêriş û kiştişî vejîyayî duştê tewr berz. Tirkîya hetê ehlaq, huqûq, heqê merdiman û sîyasetê demokratîke de têk şîya.”
Gergerlîogluyî dewamê qiseykerdişê xo de dîyar kerd ke ‘her çiqas ke tersêko gird ameyo awankediş zî piştîdayîşê ke seba Erdoganî yenî dayîş, sey cemedî roj bi roje helîyenî’ û qiseykerdişê xo wina domna: “Hukmat û Îdarekarê Tirkîya komelî ver bi adirî kirancenî. Ganî qanûno bingeyî sey peymanê komelî bibo. Fotografo ke meclîs de vejîya zaf lêmin o. Munaqeşeyê ke bê HDPyî yenî kerdiş, ti manaya înan çin a. AKP û MHP bîyî yewe û polîtîkayê zext û hêrişan tercîh kerdî. Nê 30 serrî yo ke nê polîtîkayî yenî cerebnayîş, la heta nika ti netîce nêameyo girewtiş. Wazenî Erdoganî bikerî Serekdewlet, la no felaket o.”
Ganî ma hîna zêde hewl bidî
Gergerlîogluyî peynîya qiseykerdişê xo de wina va: “Seba aştî, edalet, waye û biratîya komelî hîna zafêr xebate û fedakarî lazim o. Ma sey Platformê Aştî yê Kocaelî şer û çareserî ser de cigêrayîşan kenî. Netîce de do bêro famkerdiş ke ma çiqas heqdar î. Qîrayîş û serewedaritişê dayîkan eşkeno vernîya kaos û tehlukeyan bigiro. Cok ra ganî qîrayîşê dayîkê tirk û kurdan bibo yewe.”
NECLA DEMÎR / DÎHABER / STENBOL