MURAT KUSEYRI / ANF/STOCKHOLM
Rojnamegere û nuştoxe Nurcan Baysale konferansêkî yê Stockholm de qisey kerde û derheqê neheqî, zext, hêriş û qetlîyaman de vînayîşê xo arde ziwan.
Baysale dîyar kerde ke îlanbîyayîşê OHALî ra dima qayûmî tayînê şaredarîyê DBPyî bîyî û pêro pîya 82 hemserekî tewqîf bîyî û wina dewam kerde: “Merkezê cinîyan, dezgeyê kultur û hunerî û sewbîna xeylê sazî û dezgeyî ameyî padayîş. Qedexeyê tebervejîyayîşî estî û heta nika 4 hezar û 842 rojî yo ke qedexe esto. Êdî merdim nêşeno rojanê qedexeyan bihûmaro.”
Baysale qiseykerdişê xo de bale ante neheqîyanê pêroyîyan ser û wina va: “Colemêrg de merdimî bi Wesayîtê Bêmerdimî yê Sîlehinan (SÎHA) ameyî qetilkerdiş. Bitaybet Dêrsim û Şirnex de û xeylê cayan de şewatî estî. Sûr de 2ê kanûna 2015î ra nata qedexe dewam keno. Nika dinya de qedexeyo tewr derg Sûr de esto. Taxê ke qedexekerde yî ra 6ê ci bi temamî ameyî rijnayîş û ewja de 6 qereqolî virazîyayî. Nika zî hukmat taxanê Alîpaşa û Lalebeyî rijneno. Seba ke merdimî keyeyanê xo biteriknî, awe û cereyanê şarî ameyî birnayîş û şarî ser de zext û tedayî yenî kerdiş.”
Cenazeyan ser ro wehşet
50 ra zêde keyeyî seba ke cenazeyanê xo bigîrî, muracatê Komeleya Heqê Merdiman (ÎHD) ya Amedî kerdî û wina domnaye: “Cenazeyê PKKyîyan erd de yenî verdayîş û teslîmê keyeyê înan nînî kerdiş. Camîyê cenazeyan qebul nêkenî, cenazeyî nêşiwiyenî û defin nêbenî. Cenazeyî nêdîyenî keyeyî û medyaya komelkî ser ro yenî parekerdiş. Cenazeyêk 1 serre û nîme ra zêdeyêr Şirnex de ame vindarnayîş. Hêrişê mezelan kenî, bi no hawa sucê merdimî yenî kerdiş.”
Hêrişî zêde benî
Baysale qiseykerdişê xo de bale ante hêrişê ke cayanê cîya cîya yê Tirkîya de benî ser û wina va: “Sebebê nê hêrişan vatişê nîjadperest û cîyakar yê verfekanê îqtîdarî yo. Aşmêkî verê Samsun de karkerî raştê hêrişê nîjadperestan ameyî. Cenazeya Dayîka Aysel Tugluke Hatun Tugluke zî raştê hêrişî ameye. Tirkîya ver bi tarîtîye şona. Welatê rojawanî zî kesê ke Tirkîya de têkoşînê demokrasî danî, tena verdayî. Ez veng dana herkesî ke wa piştî bidî kurd û hêzê demokrasî.”