Ekonomînas Prof. Dr. Hayrî Kozanogluyî derheqê rewşa ekonomî ya Tirkîya de qisey kerd û wina va: “Heta ke welat de bedilîyayîşê sîyasî nêbî, mumkin nîyo ke ekonomîya welatî zî baş biba.”

Bitaybetî 15ê temuze ra nata û pêroyî de zî roja ke AKP bîyo îqtîdar ra nata hetê ekonomîye de krîzê girdî yenî cuyayîş. Badê ke îqtîdarê AKPyî zere û teberê Tirkîya de konseptê şerî da meşnayîş, dolar resa erjê rekorî, vayê her çîyî zêde bî û hêzê girewtişî yê welatîyan zaf kemî bîyo. Ekonomînas Prof. Dr. Hayrî Kozanogluyî rewşa ekonomîk ya Tirkîya ser o qisey kerd.

420 mîlyar dolar deyn o

Kozanogluyî va ‘nika 420 mîlyar dolar deynê Tirkîya esto’ û qiseykerdişê xo wina domna: “Na rewşe demo derg de bena sebebê tengasîyê cîdî. Nika bi zêdebîyayîşê dovîzî her çiqas kemî bibo zî 150 mîlyar dolar mevduatê dovîzî esto û eke dovîz bêro antiş, o wext do krîz hîna giran bibo. Ekonomîya Tirkîya heme hetanê xo reyde hetê dovîzî de sînyalê krîzî dana.”Kozanogluyî bale ant vatişê Serekomar Erdoganî yê ‘Bin balişnaya şima de çi bibo, bîyarê hurdî bikerê, bikerê TL an zî altûn’ û wina va: “Kesê ke dovîz destê înan de esto, kesê ke wayîrê tasarufo şenik î û heme bêrî têhet zî barêko giran nêvejîyeno orte. Grûba ke Erdogan qala înan keno, mîyanê aye grûbe de zî hetê ke rey dayî AKPyî, parlamenterê AKPyî û muteahîdê gird î. Ganî merdim qala înan bikero. Xora destê sektoro taybet de 100 mîlyar dolar dovîz esto nê şîrketî zî dîyar î. Wa Erdogan nê şîrketan ra hurdîkerdişê dovîzî biwazo; çimkî bi hurdîkerdişê 300-400 dolarê welatîyan, ekonomîya Tirkîya baş nêbena.”  

Şert û merc nêmendî

Kozanogluyî qiseykerdişê xo de va ‘TUSÎADî verê cu îzehet dabî û vatbî ganî OHAL bêro wedarnayîş’ û wina dewam kerd: “Tena bi gamê ekonomîye krîzê ekonomîye çareser nêbeno; ganî Tirkîya hetê demokrasî û heqê merdiman de gaman bierzo. Çimkî Qerarnameyê Hukmê Qanûnî Tirkîya hîna zaf ver bi kaosî ra benî. Yanî hetê sîyasî de şert û mercê ke no îqtîdar xo payan ser de bitepişo, nêmendî.”GANÎ BIBEDILÎKozanogluyî qiseykerdişê xo wina qedêna: “Welat de heta ke bedilîyayîşê sîyasî nêbî, ekonomîye baş nêbena. Krîzê 1994 û 2001î, krîzê giran bîy û bîyî sebeb ke vernîya bedilyayîşê sîyasîyan akerdî. Bi krîzê 94 vernîya Serekwezîrîya Necmettîn Erbakanî, 2001 de zî vernîya prosesê AKPyî akerdbî. No rey zî wina aseno ke do bedelê nê krîzî zî îslamîstî do biderî.”    


 STENBOL