Amerîka hetkarîdayîşê Hêzê Sûrîyeya Demokratîke (HSD) bi hawayo fermî tesdîq kerde. Hem zî wexto ke Erdogan waştêne Amerîka zîyaret bikero de kerde. No qerar wexto ke Wezîrê Karê Teberî yê Rûsya Sergey Lavrov Amerîka de bî, ame girewtiş. No qerar yeno çi mana, no qerar do pêvînayîşo ke Erdogan wazeno Trumpî reyde bikero, ser de tesîr bikero, an nê?Babete ser o Pisporê Sûrîye Musa Ozugurluyî qisey kerd.Ozugurluyî va ‘no qerar tena dayîşê hetkarîya sîlehan nîyo, eynî wextî de yeno manaya ‘bê kurdan averşîyayîşêk nêbeno’ zî û wina dewam kerd: “Êdî Rûsya zî fam kerdo ke ganî raştîya Rojawanî qebul bikero. Verê cû Tirkîya, Sûrîye, Amerîka û Rûsya bê kurdan çareserîyêk fikirîyayênê. Labelê nika raştîya kurdan qebul kenî, nika Rûsya zî ameye na nuqta. Rûsî hesasîyetê Şamî zî esas gênî û wazenî bi no hawa netîce bigirî.”
Nêwazeno bigîro
Ozugurluyî va ‘wina aseno ke Rûsya tesîrê Amerîka qebul kerdo’ û wina domna: “Heta nika tena Tirkîya îtîrazê nêyî kerdêne. Nika Şam daxî kurdan nêgêno vera xo. Cok ra tena kurd û Tirkîya vera yewbînan de yî. Rûsya polîtîkaya Tirkîya ver tayê tepîya vindetêne, la nika ewnîyayî ke Tirkîya se vajo zî ewja de raştîyêk esta. Cok ra nika hewl danî kurdan reyde pê bikerî. No qerar nêyî nîşan dano. Êdî ti welat nêşêno raştîya kurdan înkar bikero. Bêxera Tirkîya her kes nêyî vîneno. Rûsya û Amerîka na raştîye dîyî, Amerîka kurdan sey muttefîk vînena. Qeraro peyên ke ame girewtiş, qerarêko stratejîk o.”
Beno ke beşdar biba
Ozugurluyî dîyar kerd ke Amerîka û Rûsya vera DAIŞî de peymanêk viraştî û wina va: “Hedefo sifteyîn tîya de DAIŞ o û cok ra operasyonê Reqqa hem seba kurdan, hem seba Şam û hem zî seba Rûsya û Amerîka çîyo ke bîyaye yo. Îxtîmal esto ke artêşa Sûrîye zî beşdarê operasyonê Reqqa bibo. No het de Wezîrê Karê Teberî yê Sûrîye Velîd Mualîmî va ‘kurdî vera DAIŞî de têkoşîn danî’ û no zaf muhîm o. Şîyayîşê Erdoganî yê Amerîka zî na raştîye nêbedilneno. Amerîka qerarê xo daya, beno ke tayê îzehetan bikera, la pratîk de tesîrê înan çin o. Beno ke peymana ke kurdî zî tede ca gênî, bêro viraştiş. Amerîka babeta kurdan de Rûsya û Sûrîye girewta vera xo, na game ra peyser şîyayîş nêbeno. Tirkîya zî mecbûr a ke polîtîkaya xo bibedilna; çimkî sewbîna çareyê aye çin o.”
DÎHABER/ANQARA