Hikumatê AKP, 7ê Hezîran ra tepya, konseptê herb vist dewre û netîceyê no konseptî de bi seyan kesê sîvîl qetil kerd, zaf qeza û sûkan zî bi hêrişê tanq û topan xirab kerd. Verra no konseptî her ke şino nêrazîbiyenê çormeyanê demokratîk û azadîwaşt benê hera. Tewr peynî de 1128 akademîsyenê zangehan bi deklarasyonekê ‘Ma nêbenî hemkarê no herbî’ waştişê xo yê haşthi rayapêroyî ra îlan kerdî û no semedî ra hetê Reîscumhûrî hedef ameybî nîşandayîş. Peycoy zî raştê tehdîtanê merdişî yê serçete Sedat Peker û çormeyanê faşistîn ameybî. Veriya çend rojan zî operasyonê binçimkerdişê akademîsyenan destkerd ci.
Derheqê babedî de, Zangehê Northeasternî ra Prof. Dr. Valentîne Moghadam û Zangehê Londraye ra Prof. Dr. Nadje Al-Alî qalî kerdî.
Dinya temaşe keno
Prof. Dr. Valentîne ciresna ke, çîyo ke wextê peynî de Tirkîye de qewimeno merdimî dano fikiryayiş. Valentîne vist vîrî ke, akademîsyenî serva ke herb û şîdet vindero, heqê xo yê welatijî ard ca, la no semedî ra hedef amey nîşandayîş, wezîfeyê xo ra amey dûrvistiş û wina dewam kerd: “Ez no babedî ra bir şaş menda. Xora ser şîdeto ke dewlet şixûlnena de merdim şaş maneno. La ser vatişê Erdogan’î dûrvistişê akademîsyenan hetê demokrasî, azadîya akademîk û sewbîna de, Tirkîye rê taloke roneno.” Valentîne da zonayene ke, dinya awayo ke etiryaye Tirkîye temaşe keno.”
Serkewtişê ceniyan
Prof. Dr. Nadje Al Alî zî hayr ant qetilkerdişê Sêvê Demîr, Pakîze Nayir û Fatma Uyar û dîyar kerd ke serkewtişê ke cenîyê Kurdî qezenç kerdî, sewbîna cayê dinya de heta nika qet nêameyo diyayîş û wina vat: “Şarê Kurd reyde cenî zî raştê hêriş û qetlîaman yenê û no trajedî yo. Cenîyê kurd rîwalê serkewtişê xo benê hedef. Ma binçimkerdişê akademîsyenê ke verra herb vengdayîşê aştî kerdî, bi etiryayişî temaşe kenê.
Ma dîrokê ra zanê
Prof. Dr. Al Alî da zonayene ke ay bi xo zî, serva vinderdişê hêrişan îmze eşt û bi nê vatenan qalîkerdişê xo qedîna: “Ez him dîroka Almanya ke tede pîl bîya û him zî wextê Saddam Huseyîn ê Iraqî ke merdimê min tede cuyaynê ra zana ke hêrişkerdişê azadîya akademîkî yeno manaya yew rejîm êdî nêşkeno kesê ke fikiryenî qane bikero û semedê kontrolkerdişî wina keno. Tirkîye bi no hawa tenya huqiqê xo nêpelçiqnena, eslê xo de zeîfbiyayişê xo zî damûsnena. Encex dewletê zeîf û bêbawer êşkenî vernîgirewtişê inasarên bikî. Dinya heme bi no hawa îxlalkerdişê heqê merdiman ê Tirkîye pêhesîya.”
JINHA/AMED