Ti, to bêriya koyan kerdbî. To zaf bêriya koyan kerdbî. Ti nêmusaybî bajaran. Peyê panc seran to dî ke panc serrî nê pancas serrî kî bivîyarê ti nêmusena bajaran. Koyî vîra to ra nêvejînê. Offf to çiqas bêriya înan kerdo.
Nawo wext o. Nawo wext o ti do şorê ko. Heyecanode henên ti gureta ke, keyf keyfê to yo. Zerrîya to ya bele kena ke bi firo. Bi per bo û bifiro. Hem tenê nêşona ko ti şono mîyanê o komelo ke terteleyî ra vîyart o. Verganê haran derba tewr girane naybî nê komelî ra. Dirbeta tewr giranê canê nê komelî de viraştî bî. To waştênê dirbeta înan bivînê. Hêvîya to estbîye ke ti şenik bo kî dirbeta înan rê bibê derman. Dermanêk kî ti bê. Dermanêk kî to ra bo.
Ti gina raya ro. Rayî ax rayî! Pênîya nê raya kotî ya? Esta ya çîn a? Qet qese çîn o ti înan ra zaf heskena. Çira hendê înan ra hes kena? Çi taw de ti înan ra hende hes kena? To rê hînî êno ke maya xo ra bîya nêbîya.
Na rey raya to Qamişlo de dest pêkerde. Ti bajarê Qamişloyê zaf nas nêkena. Ti tenê çend reyan tê ra ameya û şîya. A embaza ke ereba ramitênê to ra va, “qet qiswetan mewe ez do to berî Qampa Newroze”. Ti bîya rehet. Bi a rehetiyê to va; “o taw ez ewro Derîk de bimanî şodir şorî qampî”. Şima bi na tore pêamayî. Şengal tarîf nêbeno êno cuyene.