AHMET KANBAL / MA / MÊRDÎN
Newala Xûrsî ke qezaya Qoserî ya Mêrdînî de yo û bi serran o bi tutinê xo yeno zanayene de xesadê tutinî dest pêkerdo. Newale hem rindîyanê xo yê tebîîyan û bi tutinê xo hertim vîrê merdiman de ya. Kesê ke tîya de cuyenî zafane debara xo tutinî ra kenî.
Tutin karêko zehmetin o û ramitiş ra heta ke reseno wextê xesadî zaf kede wazeno. Cinî û camêrdî serê sibayî rew kewenî mîyanê hêgayan û tutinan arê danî û la ra kenî û aliqnenî. Tutinê ke yenî aliqnayene binê tîje de yenî verdayene û heta ke ziwa benî ewja de manenî. Dima ra makîneyan ra yenî derbazkerdene. Bazarê tutinî de ê ke qezenç kenî tucar î.
Dewijan ra Selahattîn Ornek bi serran o ke karê tutinî keno. Ornek dîyar keno ke ê aşma sibate ra nata dest pê kenî û nizdîyê 8 aşmî dewam keno. Ornek wina domneno: “Ma serre de 2 reyî ber gênî. Karêko zaf zehmetin o. Ma heqê keda xo nêgênî. Labelê ma dewa xo de yî û mîyanê keye û dostanê xo de yî. Tucarî ma ra 50 TLyî ra gênî, labelê bajar de 150 TL ra roşenî.”
Cinîyan ra Bedîa Orneke zî vana ‘sewbîna kar ma dest ra nîno’ û wina dewam kena: “Nameyê ma bîyo tutinkar. Karêko zaf zor o. Labelê seba ke ma vêşan nêmanî, ma nê karî kenî.” Muzeyyen Orneke zî dana zanayene ke ê heta peynîya serre seba ke tutin bireso kede danî û serre de 2 reyî tutinî la ra derbaz kenî.