Endama Komeleya Domanan a Gundeme Emrah Kirimsoy derheqê no babetî de vat: “Lazim o domanî derheqê çîyo ke dormarê înan de qewimyeno bidekewî mîyanê biregirewtişî. Domanî yenîy qetilkerdiş û cilê gerîla hetê laşê înan de yeno ronayîş û sey ‘terorîst’ yenî îlankerdiş. Labelê no raştîya domanîya înan nêşkeno  bibedilno. Domanî aştî sey ‘ser sibayan yewnan ra vacîy rojbaş’ pênase kenîy. Ma sey komelo ke yewnan ra nêşkenîy vacîy rojbaş î. Ger ke ma wazenîy têrey de bicuyî se aye wext lazim o ma çareya nêy persgirêkan biveynî.”

Vengê hembar
Kirimsoy bal ant ser îxlalkerdişê heqan û wina vat: “Ma sey Komeleya Domanan a Gundemî  bi taybetî semeda ke îxlalkerdişê heqê domanan bêro vînayîş, do raporan hedre bikerî. Lazim o semeda nêy zî vengekê hembar bivecyo. No derheqî de ma raporê xo do demo ke nêzd de hedre bikerî û pêroyîna şarî rey barr bikerî.”

Ceza bikêrî
Kirimsoy wina qalîkerdişê xo bi peynî kerd: “Lazim o dewlet hedefgirewtişê şarê sîvîlî ra fek verado. Semeda cuyayîş bi awayo raştikên û samîmî têreyde bêro kerdiş, lazim o ravêreyeya muzakereyî rayna bêro destpêkerdiş. Labelê wexto ke ravêreyey ke yeno destpêkerdiş lazim o hemverê cezanêkerdişê demo verên reyde têkoşîn bêro dayîş.  Cezanêkerdiş beno ke îxlalkerdişan vêşî bikero. No semed ra demo ke rewêr lazim o no rewşa şerî bi peynî bibo û kerdoxîy zî bêrî cezakerdiş.”

Ugur ard vîra ma    
Kırımsoy ard zıwan ke komel mîyanê tersa ‘ma gelo serranê 90’î de cuyenî?’ de ya û wina vat: “Qetlîyama ke Gîyadînî de qewimyay ra dima polîsan cilanê gerîlayan hetê domanêy ke amey qetilkerdiş ronay û waştîy ke înan sey gerîla nîşan bidîy. Eslê xo de na hedîse qetlîyama Ugur Kaymaz ê 12 serre yî ke bi 13 gulan amebi qetilkerdiş û o zî bi cilanê gerîlayî sey terorîst amebi nîşandayîş ano vîr ano vîrê ma.
Wexto ke merdim ewnêno, domanî eşkenî şer zî bikerî la no nêşkeno raştîya domantî bibedilno. Taybetî semeda ke domanî verpersîyarîya ma hemverî înan hîna vêşî beno, no xeylê muhîm o.”

 ANF/ANKARA