Fermandarê Hêzê Azadî yê Yewbîyaye (BOG) Ulaş Bayraktaroglu her çiqas ke cuyêka zehmetin de cuyayo, reyna zî erjanê xo ra qet tavîz nêda û cuya xo bi têkoşîn derbaz kerd. Bayraktaroglu keyeyêko sosyalîst de pîl beno û kura de xoverdayîşêk yan zî têkoşînêk bibo, ewja de tewr vernî de ca gêno. Cok ra zaf reyan ame tepiştiş, tewqîf bî û raştê îşkenceyî ame.
Ulaş 19 serreyîya xo de keweno destê polîsî û erzîyeno zîndan. Serra 2000 de bi ‘Efûya Rahşane’ vejîyeno teber û reyna dest bi xebatanê xo kerde. Bayraktaroglu xoverdayîşê Gezî de tewr vernî de ca gêno û keweno zîndan. Badê ke zîndanî ra vejîyeno, vera xo dano Rojawanî û vera DAIŞî de mîyanê têkoşînî de şer keno. Ewja de beno fermandarê BOGî. Dayîke Melîke Çelîkere (66) qala cuya lajê xo kerde.
Têkilîya ma zey embazey bî
Çelîkere va ‘têkilîya mi lajê mi reyde sey embazêk bîye’ û wina domnaye: “Çîyo ke o bi xo nêkerdêne, ti kesî zî nêerşawitêne. Mi wexto ke ey erşawit kolej, mi ra vatêne ‘nêyî heme burjuva yî û domananê dewlemendan î’ û dima ra şî normal lîseyêk. 16 serreyîya xo de beşdarê têkoşînê şorişî bî. Ulaş zîndan de zî qet nêvindet û ge-ge kewt grevê vêşanî. Ulaş zîndan de zewijîya û dima ra vera xo da Rojawanî. Ulaş keso ke bisebir, jîhatî û hetkarîdayîşî ra zaf hes kerdêne. Dormeyê ci de yê ke ey ra hes nêkerdêne, çinêbî.”
Kurdan reyde şer kerd
Çelîkere va ‘Ulaş waştêne ke beşdarê tevgerê kurdî bibo û wina va: “Ma pêvînayîşê xo yo peyên de Ulaşî ra va ez wazena qeraxê Çemê Firatî de bicuya. Ey zî mi ra va ‘xora ma nika rizgar kenî, dima ra beno’. 2 lajê mi estbîy, nika çin î, labelê heme kesê ke Rojawan de şer kenî domanê min î. Mi zaf waşt ke şêra Rojawan de şer bikera. Nika ez wazena Rojawano ke Ulaşî hewl dayêne azad bikero de bicuya. Wexto ke xebera şehadetî ameye, ez qet nêbermaya. Çimkî orte de raştîya şerî esta. Ez qet ey xo vîra nêkena.”
M. ŞAH ORÛÇ / METÎN YOKSU / DÎHABER / STENBOL