Bi nameyê Abdullah Derînî de kesêkî serra 2015î de bi îdîaya ke roketî reyde hêrişê qereqolî kerdo, amebî tepiştiş û dima ra tewqîf bîbî. Çend rojî verê zî reyna ame îdîakerdiş ke eynî kes Zîndanê Tîpa Dyî yê Amedî de întîhar kerdo.
Derîno 34 serreyî 1ê tebaxe de amebî tepiştiş û hêzê dewlete ci berdbî qezaya Pîranî ya Amedî. Ewja de nizdîyê 11 rojan seba ke bibo îtîrafkar, îşkence bide kerdbî. Roja 5. ya tepiştişî de xebere dîyena keyeyê ci û wexto ke ma û pîyê ci şonî zîyaretê Derînî, vînenî ke Derîn îşkence ver bêhal mendo. Dozger dayîka Derînî ra vano ‘Derînî ra mevaje lajê mi, werekna to şite nêdayêne ci, o heq nêkeno’. Wexto ke nêşînî keye seba îtîrafkarî îkna bikerî, fek keyeyî veradanî. Labelê Derîn 11 rojan ra dima yeno tewqîfkerdiş.
Derîn nizdîyê 32 rojan zîndan de maneno û dima ra yeno vatiş ke Derîn xo xeniqnayo û bi no hawa întîhar kerdo. Wexto ke otopsîya Derînî yena viraştiş, yeno dîyayîş ke qirika ci de sîyatî çin a. Wexto ke keye seba ke cenazeya xo bigîro, şono nêweşxane, na rey çi şaredarî û çi zî nêweşxane ambulanse û wesayît nêdano. Ser de polîsî şonî û bi vatişê ‘eke slogan bêro eştiş, ma do şima ra bizanî’keyeyî tehdît kenî.
Ez bawer nêkena ke întîhar kerdo
Pîyê Derînî Sabrî Derînî va ‘badê ke ma musayî ke Abdullah tewqîf bîyo, ma Roşanê Qurbanan de şîyî pêvînayîşê ci’ û wina dewam kerd: “Lajê mi ewja de mi ra va ‘ê wazenî ez ser tayînan de îfade bida, labelê seba ke ez nêşinasnena, mi îfade nêdayo’û mi ra sol û cilî waştî. Ez bawer nêkena ke lajê mi întîhar kerdo.”
Wa nêro sereyê ti kesî
Dayîke Hayrîye Derîne zî va ‘qereqolî 5 rojî ra dima xebere da ma’ û wina va: “Wexto ke ma şîyî qereqol, lajê mi va ‘tayînan ser mi de îfade dayo, cok ra mi tepiştî’. Dima ra ma ameyî keye û çend rojî ra dima dozgerî veng da ma. Wexto ke ez şîya, dozgerî ma ser de zextî kerdî ke ma lajê xo seba îtîrafkarî îkna bikerî. Qereqol de fotografê ma ancîyayî û bi zorî kaxitêko ma nêzanî ser de çi nuşte bî, bi ma dayî morkerdiş. Qirika lajê mi de sîyatî çinêbî, no întîhar nîyo. Çîyêko ame sereyê ma wa nêro sereyê ti kesî.”
ANF/AMED
Dozgerî derb sey henekî dî
Heto bîn ra serra 2012î de Nêweşxaneyê Leşkerî yê Kasimpaşa yê Stenbolî de bi nameyê Îbrahîm Halîs Denîzî de kesêkî leşkero bi nameyê Sînan Işikî kalorîfer ra kelepçe kerdbî û dima ra ey derb kerdbî.
Derbî ver serpezê Işikî amebî girewtiş raporê ‘Işik goreyê leşkerî munasîb nîyo’ ame dayîş û terhîs bî. Işikî Denîz gerre kerd. Çarçewaya tehqîqatî de îfadeyê Denîzî ame girewtiş û Denîzî îfadeyê xo de va ‘mi henek kerdbî’. Dozgerî zî qerar da û va henekê yewbînan kerdî û lazimî bi tehqîqatî çin a. Wexto ke mehkeme rê îtîraz ame kerdiş, hetê Mehkemeya Leşkerî ra ameye redkerdiş. Nêyî ver avûkata Işikî Nezahat Paşaye doze kirişte Mehkemeya Heqê Merdiman ya Ewropa.
ÎZMÎR