DÎREN YURTSEVER MA/ENQERE Tirkîya de vilabîyayişê Vîrûsê Koronayî ser o rêziknameyê qanûnî yê înfazî rojdemî ra ame labelê Îqtîdarê AKP û MHPî na babete de zî polîkayê xo yê cîyakerî nîşan dayê û hepsê sîyasî ke taybetî heme Kurd ê teberê nê qanûnî veradayê. Cîyakerîya Hukimata AKP û MHPî ra Wekîlê CHPê Konyayî Abdullatîf Şener bertek nîşan da û vat ke xo ra vera vîrûsî tedbîrê îqtîdarî goreyê standarê Rêxistinê Weşîye yê Dinyaye nîyê, vatişê Wazaretê Weşîye şeffaf nîyê û Tirkîya de zî rêjeya viraştişê testî zî kêm ê. Şener bal ant tayînkerdişê qeyuman û wina vat: “Tewro averşîyayîşê ke yenê cuyayiş, nîşan dano ke Tirkîya de otorîtebîyayiş her ke şîro aver şîro. Hukimat çi heyfo bi kêfî hereket kena, tayînkerdişê qeyuman zî netîceyê otorîtebîyayişê hukimate yo. Ganî bi lezî tayînkerdişê qeyuman ra hukimat fek vera bido.” Wa hepsîyan serbest bimanê Şener pêroyina Tirkîya de rêziknameyê AKPî yê ke sey efû yeno nîqaşkerdiş ser o destnîşan kerd ke dijî dewlete kerdişê sûcan, çarçiweya nê qanûnî girewtiş, nêzîkatîyêka şaş a û wina qedîna: “Kam çalakîyêk bikero/a, îqtîdar bi lezî sûcker îlan keno, Tirkîya de çi heyfo ke huquq zî goreyê sîyasetî hereket keno. Erdogan vatînê; dewlete eşkena vera xo sûcê ke ameyê kerdiş efû bika la mabenê şexsan sûcê ke ameyê kerdiş nêeşkena efû bika. Ma eke huquqê Îslamîyetî esas bigê, taybetîya efû de babetê ke dewlete elaqadar kenê estê. Eke hepisxaneyan de no vîrûs do vila bibo telukeyêko zaf bi gird o, no ser ganî bi cîyakerî heme hepsîyan serbest bêrê veradayiş.”