Parlamenterê HDPyî yê Amedî û miftîyo kehen Nîmetullah Erdogmuşî wextê qedexeyê tebervejîyayîşî de seba ke nimajê îne yê sîvîlî de xutbe dabî, derheqê ci de doze amebî akerdiş. Roniştişê 2. yê doze ame dîyayîş.
Roniştişî de Erdogmuşî pawitişê xo kerd û va: “Emrê mi nê warî de vîyart.Seba ke mi xizmetê dînî kerdo, derheqê mi de îdîaname amade bîyo û vajîyeno ‘Hesaban ra nimajê îne yê sîvîlî’ û ‘hesaban ra xutbe’ ameyo xebetnayîş, ez nê vatişan qebul nêkena.
Mi pêşnîyaz kerdbî
Erdogmuşî dewamê qiseykerdişê xo de va ‘Mi bi xo nê nimajî organîze kerd. Nimaj bi xo aramî, aştî û huzir o. Ez Sûr de ameya dinya û ewja de pîl bîya. Mi nimajê xo de seba Sûrî dua kerd. Ez derheqê xutbe de takdîrê ci şima rê verdena.”
Avûkatê ci Mehmet Emîn Aktarî zî wina va: “Na doze do derbazê tarîxî bibo. Tîya de vatişê Hz. Muhammedî yenî mehkemekerdiş.“ Pawitişî ra dima derheqê Erdogmuşî de qerarê beraat ame dayen.
AMED