Vatişê ‘Toledo’ rijnayîşî meşrû keno

Qezaya Sûrî ya Amedî ke netîceyê hêrişê hêzê dewlete de ameye talankerdiş, hêrişan ra dima hetê dewlete ra ameye rijnayîş. Rijnayîşo ke 2 serrî yo dewam keno, nika resayo taxê ke tede qet şer nêbîyo zî. Serekwezîro kehen Ahmet Davutoglu 1ê Nîsana 2016î de seba rijnayîşî vatbî ‘Ma do Sûr bikerî Toledo’. 

Serrêk ra dima 4 taxanê Sûrî de dest bi viraştişê keyeyan kerdî. Heta nika 50 keyeyî ameyî viraştiş. Babete ser o Aktîvîsta Ekolojîyî Suna Sumere qisey kerde. Sumere va ‘Sûro kehen û Toledo zaf yewbînan manenî’ û wina dewam kerde: “Her di merkezî zî meymandarîya bawerî û kultiranê cîya-cîyayan kerdî. Qezaya Sûrî 2 serrî yo ke heme ameyo rijnayîş. Bajarî zî sey merdiman bi ruhêko zereyê înan de weş benî. Rijnayîşî dewam kenî. Bi waadanê viraştişê Toledo şarî xapênenî û hewl danî rijnayîşî meşrû bikerî.”

Eleqeyê xo çin o

Sumere vist vîrî ke ‘bi awankerdişê tarîxêko sunî, Sûr çi Toledo maneno û çi zî Sûro kehen maneno’ û qiseyê xo wina qedênaye: “Serekwezîr bi nê vatişî zulmî meşrû keno. Bi rijnayîşan hewl danî Sûr de herinda cayanê tarîxîyan awanîyanê betoninan virazî. Kuleyê şopnayîşî ke bedenan ra berzêr yenî viraştiş, do bi no hawa Sûr bikerî zîndanêko akerde. Toledoyêko newe yeno viraştiş, ti eleqeyê xo bi Toledo reyde çin o. Senî ke ruhê kesê ke mireno, reyna ganî nêbeno, ruho ke Sûr de yeno çinîkerdiş, reyêka bîne ganî nêbeno.”

MELÎKE AYDIN / ŞÛJIN / AMED