Vêjnayîşê Hewtê Hezîrane, qederê şaranê Tirkîya tayîn keno. Na zî asena ke Tirkîya de bê HDP, alternatîfê AKP çin o. CHP bi politikaya xo ya ê mîlîtarîzm û zîhnîyetê serranê 1930an nişna eyro meseleyanê şaranê Tirkîya çareser biko. MHP zî bi zîhnîyetê xo yê faşîzanî, realîteyê Şaranê Tirkîya ra zaf dûrî menda.
Nê wirdî partî nê şertan de û goreyê na politikaya xo, pey mildê xo veynenê, hinê îqtîdar nêveynenê. MHP bêro îqtîdar, xo reyra qaos û têmîyankewtiş ana. CHP, ronayîşê Komara Tirkîya ra hetan eyro, zaf ray, yan tena ameya îqtîdar, yan zî bi koalîsyon ameya îqtîdar. Na partî zî hetan eyro meseleyê Tirkîya çareser nêkerdê. Nika ra pey zî nişna çaraesr biko.
Xora binge de, ferqê nê heme partîyanê sîstemê (pergalî) çin o. Nê heme partîy, mîlîtarîzmî rê xizmet kenê. Bingeyê nê heme partîyan tirkîtey ser o awan bîyo. Nê hîrê partîy, heme wext behsê demokrasi kenê, la çîyêda înan û demokrasî pîya (têreyde) çin a. Nê hîrê partî faşizan yew siyaset de israr kenê, bi zîhnîyetê faşîzanî miqat benê. No dem de, nê heme partîyî, nişnê meseleyanê Tirkîya çaraser bikî.
Xora faşizm zî politikaya îmha û înkarî ra miqat beno. Faşîstî; tena xo û etnîsîte, dîn û mezhebê xo esas gênê. Sewbîna etnîseteyan, dînan, mezheban , bîr û bawerîyan qebul nêkenê. No semed ra nêwazenê ke HDP bendê vêjnayîşî ra vêro. Raşta ey Tirkîya de, yew partîya mûxalîfe esta, na partî zî HDP ya. Eke HDP binê bendê vêjnayîşî de bimano; meydan AKP rê maneno. Xora pirnika AKP zaf hewa ra ya, vernîya çimanê xo nêveynena.
‘AKP nîjadperest a’
AKP goreyê xo demokrat a, goreyê xo dindar a, goreyê xo nîjadperest a. Na partî zî sentezê sunîtey û tirkîtey esas gêna. Wazena ke goreyê nê ferasetî, sîstemê xo binge ra awan biko. Aseno ke semedo ke HDP bendê vêjnayîşî nêverno û rayna bê qoalîsyon tena bêro îqtîdar, çi destê ya (ja) ra yeno kena. Xora provokasyonê Agirî, no semed ra bîyo. Anqara de gala (hêrişê) bînaya HDP, no semed ra bîyo. Xora koyan de, operasyon û bombardimanê dewam kenê. Eke nîyet pêameyîş bibo, eke nîyet yew vêjnayîşo demokratîk bo; nê operasyonî ganî nêbîynê.
Semedo ke provokasyonê leşkeran û tîmanê dewlete rê zemîn nêvirazîyo, berpirsîyarê PKK kadroyanê xo ra vanê;“Hetan Vêjnayîşê Hewtê Hezîrane, çiman ra dûrî vindrî.” Cemîl Bayik zî vano ke; “Ma hinê nêwazenê ke, vera Tirkîya çekan bişuxulnê. Hinê ma wazenê ke, mesele bi muzakereyan çareser bibo. Ma nêwazenê ke, hinê hewayê hedîseyê Agirî provokasyonê bibî.”
Bellî yo ke PKK no dem de, nêwazena ke, yew pêrodayîş vejîyo. La dewlete semedo ke vernîya HDP bigêrîyo, PKK reyde şer bibo û bi nê şerî HDPyî goya hetkareya terorîstey ra sucdar biko, heme rayîran ceribnena. Na eşkara ya ke, dewleta Tirkîya nêwazena ke, HDP bendê vêjnayîyîşî ra vêro. Aseno ke vera şono, HDP rayanê xo vêşî kena û bendê vêjnayîşê vêrena. La berpirsîyarê AKP bi xo bawer vanê ke; “ HDP bindê bende vêjnayîşî de manena.”
Raşta ey ma, provokasyonan, dek û dilavanê dewlete ra bi guman î. Heme mûxalîf û demokratê Tirkîya zanê ke, eke HDP bendê vêjnayîşî ra nêvêro, Tirkîya verbê yew qaoûsî şona.
‘Tirkîya verbê otorîterîzmî şona’
Serekkomar Tayîp Erdogan, zî adeta sey serekê AKP xebitêno, propagandaya AKP keno. Goreyê Qanûnê Bingeyî, ganî Serekkomar bêteraf bo. Ganî heme hemwelatîyan seyyewbînan tewşo, hetkarîya tayê zumreyan û partîyan nêko. La Serekkomar Erdogan raşata-raşt teraf tewşeno û mudaxeleyê sîyasetî keno.
Semedo ke, vernîya HDP bigêrîyo û vêjnayîşê proveke bikî faşîstî Tirkîya rayna dekewtê dewre. Gungoren û Kadkoyê Îstanbulî de. Serîka Antalya, Findiklîyê Rîze û reyhanlîya Hatayî de, faşîstan gala (hêrişê) buroyanê HDP bîyo. Bêraqê HDP ameyî derrakerdiş û veşnayîş. No hêriş ra yewer, yew fayde nêveyneno. Ma peyhesîyayê ke, hêrişkarê Merkezê HDP yê Anqara ameyî tewiştiş.
Nê hêrişkaran ra yew hêrişkarî, 2011 de bi molotofkokteyle hêrişê Merkezê BDP kerdbi. No hêrişkar, ay wext bitewşîyaynî û yew ceza bigirewtnî; eyro curetê nê hêrişî nêkerdnî. Nika ra pey zî polis û mûxaberatê Dewlete estî, wa nê hêrişkarananê binan zî derhal bitewşê. Asla wa yewer provokasyon û şîdetî ra yew fayde nêpawo. Yalçin Akdogan vano ke; “Hinê Tirkîya verenê tepa menda. Ma hinê nêageyrenê Tirkîyaya verene.” Yewna het ra vano ke; “HDP wa bende barajê nêvêro, çîyêkî nêbeno, qîyamete nêwardena.” Raşta Qîyame nêwardena, la HDP eke nêdekewo Meclîsê Tirkîya, projeye yewîyeya şaranê Tirkîya darbe gêno. Eke Tirkîya de, AKP tena bêro îqtîdar, Tirkîya verbê otorîterîzmî şona.
Hem meseleya kurdan, hem meseleya demokrasi, hem zî mesleya elewîyan û ê kemnetewîyanê binan, tike erey çareser benê. Eke HDP, bendê generalanê 12ê Êlule nêvêro, destê mîlîtarîzmî zî bi hêz beno. Belkî zî na rewşe ra şerheskerdoxê ko bikewê dewre û sey sûrîye ko cengê zerrî dest pêbiko. Ko rayna qetîamê qirkerdişî dest pêbikî. Çunku qorê der û dorê gonîweran, semedo ke gonîya ciwanê kurdan û tirkan billa bibo, adeta fekê xo lêsenê.
Semedo ke Prosesê çareserî biherimîyo, çi destê înan ra yeno kenê. Na ra HDP seba kurdan, tirkan, heme şaran, karkeran yew şans a. HDP seba elewîyan, heqîqî dîndaran, karkeran, karmendan, bêkaran, xizanan yew şans a. Vêjnayîşê Hewtê Hezîrane de, vernîya şaranê Tirkîya de di rayîrê estê.
‘Tirkîya verbê deme tarîyey şona’
Eke kurdî, tirkî heme mexdûrê Tirkîya rayanê xo bidê HDP; Tirkîya de vernîya aşîtî û demokrasî û bireyey û seyyewbînaney abena. Eke rayanê xo bidê partîyanê cengî û HDP binê bendê vêjnayişî de bimano, Tirkîya verbê deme tarîyey şona. No rayîr de ameyoxê şaranê Tirkîya çin o. No rayîr, nê neway serrî yo ke ameyo ceribnayîş. Partîyanê sîstemî de demokrasî çin o.
Nê partîyî; heq huqûq, edalet û seyyewbînaneyî esas nêgênê. Nê partîyî dînê îslamî zî suîstîmal kenê, seba sîyasetê xo, seba îqtîdar û menfeetê xo, dînê îslamî xo rê kenê alet.
Heqîqî yew musluman esla nîjadperestey nêkeno. Heqîqî yew musluman; esla dînê îslamî, seba menfeetê xo karnêano. Heqîqî yew musluman; mîyanê şaran û mezheban de cîyakerey nêkeno. Heqîqî yew musluman, zulmdaran, kedwerdoxan û dizdan het de ca nêgêno.
Eke no vêjnayîş de HDP seerbikewo, Tirkîya de yew cuyo newe dest pêkeno. Hinê politikaya îmha û veng de vejêna. Tirkîya de mîyanê şaran de, mensûbanê sewbîna dînan cîyakerey nêbena. Mîyanê heme şaran de; heq, huqûq, edalet esas gîrêno.
‘Projeyê HDP, proje ya şarana’
Eke no proje serbikewo, henê dewrê dîktatoran, paşayan, efendîyan, sûltanan, mîlîtarîstan qedîno. Û Tirkîya de adeta wesarê şaran dest pêkeno û mîyanê şaran de kîn û nefret qedîno. Adeta cuyê şaran newe ra înşa beno, No welat de demokrasi û aşîtî newe ra zîl danê.
No vêjnayîs, vêjnayîşêko rêzin nîyo. Seba cuyêko newe, cuyêko azad û demokratîk, cuyêko birûmet û aşîtîyane; na ray, rayê ma HDP rê. No vêjnayîş û Projeyê HDP; seba cinîyan, ciwanan, kedkaran, bêkaran heme şaran û mensûbanê heme dînan û mezhebanê Tirkîya, yew şans o. No semed ra, no vêjnayîş de rayê ma HDP rê.