Referandûm her ke şono nizdî beno û bi nizdîbîyayîşê referandûmî xebatê tewir bi tewir vejîyenî raste. Her kes bi hawayêko cîya sloganê ‘nê’ ano ziwan û piştîya xo dano cepheyê ‘nê’yî. Nînan ra yewe zî kampanyayê ke medyaya komelkî ser ro ameyî destpêkerdiş î.
Roja ma ya ewroyên ke medyaya komelkî warêko zaf qewetin o de kampanyayê winasî tesîrêko gird virazenî. Her roje medyaya komelkî de ‘gelo ewro derheqê ‘nê’yî de vîdeo, resim û sewbîna çîyêk esto, an nê?’ yeno perskerdiş. Nê rojan de medyaya komelkî ser ro tayê xebate û kampanyayê ke xeylê bale ancenî û piştî dîyeno înan, estî. Kampanyayê ‘Cîran to va nê’ û ‘Cîrane wa bixêr bo’ ke medyaya komelkî ser ro ameybî destpêkerdiş rê her ke şono eleqe û piştîdayîş zêde beno.
Do senî bêro ramitiş?
Kampanyayê ‘Cîran to va nê’ û ‘Cîrane wa bixêr bo’ do senî bêrî meşnayîş? Goreyê kampanya do ti kes seba xebatan paweyê parlamenter û xebatkaranê HDPyî nêvindero. Her kes bi xo şêro zîyaretê cîranê xo û dima ra fikrê cîranê xo biperso. Bi no hawa cîranî do bêrî îqnakerdiş û fotograf û dîmenê ‘nê’yînan medyaya komelkî ser ro pare bikerî. Hedefê kampanya o yo ke şert û mercê OHALî de hetê fikir û reaksîyonî de komelî bîyarî têhet. Seba ke merdimî bişînbî îtîrazê xo bîyarî ziwan, îmkanî bêrî xelqkerdiş. Bi parekerdişê probleman, ters û zextî orte biwedarnî.
Sebebê kampanya çî yo?
Seba ke Hemserekê Pêroyî yê HDPyî, parlamenter û xeylê xebatkarî ameyî tewqîfkerdiş, şert û mercê domnayîşê xebatan teng bîyo. Bi na kampanya welatîyî do berpirsîyarî bigirî û xebatan bimeşnî. Çîyê ke çarçeweya kampanya de vejîyayî orte nê yî: “Cîran, muhtacê wela cîranê xo yo. #Cîran to va nê; Cîran, muhtacê gula cîranê xo yo. #Cîran to va nê; Cîran o yo ke merdim bişînbo ey ra awa firîngîyan û rûne biwazo. #Cîran to va nê; Cîran o yo ke ma bişînbî beqlawa, borek, aşure û tasêk şorbe ey reyde pare bikerî. #Cîran to va nê; Xebera başe de ewil cîranê merdimî seba ‘Xêrin bo’ yeno. #Cîran to va nê; Dej û kêfweşîya taxe ortax î. Cîrantî ortaxîya ameyoxe ya. #Cîran to va nê.”
Wa rojê şima xeyrên bî
Heto bîn ra derheqê kampanya de îzehetêk ame dayîş û îzehet wina bî: “O wext bêrê ma qerarê ke ameyoxa ma eleqeder kenî, ewil bi cîrananê xo reyde qisey bikerî. Ma beranê cîrananê xo akerî û qedehêk çaya înan bişimî. Wa ê vajî û dima ra ma vajî, bi no hawa ma veng bidî rojanê xêrinan. Seba heqê cîrantî ma rê heq û huqûq lazim î. Pîlanê ma bi hawayo weş vato ‘Cîranê xo rê xêr biwaze ke wa xêr bibo para to’. Ma seba hêvîyanê xeyrên cîranê xo ra dest pê bikerî. Wa rojê şima xeyrên bî.”
ŞÛJIN/AMED