Grevê Veyşanî ke vera tecrîdê ser Rayverê Şarê Kurd Abdullah Ocalanî û îxlalê heqan yê zîndanan 15ê Sibat ra tepya destpa kerdî ramenê. Nika 20 girotxaneyanê cîya yê Tirkîye de 187 tepiştey Grevê Veyşanî yê bêdem û bêdorveger de yê.
Girotxaneyê Şakranî T-2 de 20, Şakran T-3 de 10, Şakran T-4 de 15, Şakran cinî 5, Sincan cinî 16, Tekîrdag de 10, Tarsus de 5, Bolu de 10, Antalya de 5, Hatay de 11, Kepsut de 10, Duzce de 4, Ceyhan de 3, Bayburt de 2, Menemen de 4, Gebze de 7, Silîvrî de 10, Bandirma de 21, Kiriklar de 12, Kandira de 5 tepiştey Grevê Veyşanî de yê. Girotxaneyê Şakranî de Grev roja 57. de yo. Û No zî yeno maneya şêmigê talokeyî. Malbatê tepişteyan zî seba wayîrvejyayîşê nûmayîşa domananê xo, Amed de destpa grevê veyşanî kerdî. Malbatan waştî ke desinde waştenê tepişteyan bîrê ca û aşkere kerdî ke heta ke waştenê nûmayîşkaran bîrê ca iyê dê bêveng nêmanê.
‘Ma bêveng nêmanenê’
Welatijan ra Guler Yuksekbag ke seba di rojan Amed de kewta grevê veyşanî, merdeyê ci Rakip Yuksekbag o ke 24 serrî yo girotxane de yo, nika zî seba paştîdayîşê tepişteyan Girotxaneyê Riha de kewto grevî. Yuksekbag ard ziwan ke Tirkîye de ti wext şert û mercê tepişteyan nêvurnîyay û her ke şino benê giran. Guler Yuksekbag vist vîrî ke vera bêhiqûqî û şertanê giran tepişteyan her tim xover da yo.
‘Ma dê serbikewê’
Yuksekbag, ard ziwan ke îdareyê girotxaneyan û gardîyanî wazenê îradeyê tepişteyan bişikînê û wina va: “Ma dê zî teber de bi xoverdayîşî hemverê zorvajî û bêrûmetî wayîrê xoverdayîşê tepişteyan bivejyê. Waştenê tepişteyan waştenê ma yê. No 56 rojîyo ke Şakran de grev rameno. Ma ma dê senî hemverê nayî de bêveng bimanê. Ma tîya ra reyna veng danê Erdoganî, şima dê ti wext bi nê zorvajîyan netîce nêgîrê.” Guler Yuksekbag vist vîrî ke serkewtiş bi xoverdayîşî mimkun o û va, helbet ma dê serbikewê.
‘Ma dê bêveng nêmanê’
Dayika Nejdet Kaya ke no 57 rojîyo Girotxaneyê Şakranî de Grevê Veyşanî de yo, Makbûle Kaya zî Amed de destbi grevî kerd. Kaya da zonayen ke lajê aye hemverê bêrûmetî wezîfeyê xo ano ca û va, “Bi OHALî ra dima bêhiqûqî û zorvajî ferzê ma kenê. Heqaretê ma kenê. Helbet ma dê înan qebûl nêkerê. Tenya bi bedena xo bo zî ma dê xover bidê. Ganî ca de waştenê domananê ma qebûl bikerê. Zey malbatî ma heta çilka peynî yê gonîya xo, ma dê xover bidê. Ma dê tim domananê xo het de bê.” Makbûle Kaya da zonayen ke tewr peynî de aye roja Yekşeme bi lajê xo Nejdet Kaya ra qisey kerdo û lajê ci wina vato: “Dayê ma zaf rindîye. Xoverdayîş ra xeyrî teba çinêbi. Ma dê serbikewê.”
‘Ma na rayî ra nêageyrenê’
Dayika bi nameyê Behîye Duran, a ke 2 lajê ci girotxaneyan de Grevê Veyşanî de yê zî vist vîrî ke, bi serrano lajê ci yenê sirgûnkerdiş îşkencekerdiş û seba ke nê kerdenan qebûl nêkenê ewro zî xover danê. Duran da zonayen ke no 21 serrî yo ke lajê ci girotxane de yê û va, ‘heta ke waştenê domananê ma nîrê ca, ma dê zî na rayî ra nêageyrê.
‘Ma dişmenê xo rind silasnenê’
Mehmet Pervane ke lajê ci Ragip Pervane Girotxaneyê Tîpa T ê Balikesîr de Grevê Veyşanî de yo zî bi persa “Ma ma zî însan nîye, ma heqê ma zî çin o ma zî zey însanan weşî bikerê?” vera binlingkerdişê heqan nêrazîbîyayîşê xo ard ziwan. Pervane’yî vist vîrî ke ê hemverê kesê ke teslîmîyetî ferzê înan kenê de xover danê û wina va: “Ewro dewletêka ke wazena bîyayîşê xo ser nêbîyayîşê kurdan de biramno esta. Ma Kenan Evren’î, Serokomar Erdogan’î, Seddam Huseyîn’î û Hîtler’î rind silasnenê. Senî ke Zîndanê Amedî de Hûmara 5. de Kemal û Mazlûman xover da û serkewtî, ewro zî tepiştey xover danê û iyê dê serbikewê.
‘Ma dê paşt bidî domananê xo’
Şefî Hayme zî pîye 4 tepişteyanê ke girotxaneyanê Bolû, Edîrne, Rîze û Amed de manenê yo. Yew lajê ci zî Girotxaneyê Bolû de 50 rojan ra vêşî yo grevê veyşanî de yo. Hayme vist vîrî ke heta ke waştenê tepişteyan nîrê ca, iyê dê xoverdayîşê xo biramnê û bi nê vatenan qiseyanê xo qedêna: “Kurd bi kiştişan nêqedîyenê. Ma dawaya xo de heqdar ê û ma dê serbikewê. Ma nêwazenê ke kes bimiro. La mîyan de merdiş zî bibo, ma dê tim domananê xo het de bê. Ma dê raya xo ra nêagerê. Ma wazenê ke ca de waştenê tepişteyan bîrê ca.
AMED