Saraya Kanîya Kurda. Sara cinî ya. Sara cinîyade rindek a. Rindekiya Sara zîyaderî gonîgermiya aye ra êna. Kanê fek û lewî, çim û bûrî şoret ê. Rindek ê. Lê esas rindekîya aye şîrînîya aye ra êna. Gonîgermîya aye ra êna. Sara Kanîya Kurda ra ya. Kanîya Kurdaya ke bi şoreşî ra bîye Kanîya Kurda. Verê seba ke şarê ereb ameyo dormarê hînî(nika hînî çîn o. Miçiqiyo) de mal û dewarê xo çiraynayo şarê Kurdî uca ra vato Kanîya Ereb a. Bi şoreşê ra reyna şarê Kurd nameyê ci vurna kerd Kanîya Kurda. Yanê Hînê Kurda.
Sara mordem a. Sara serê heta linga mordem a. Pak a Sara. Ti vana qey Saraye qet qefçilî nedîya. Tim û tim pak menda. Ya kî ti vana qey Sara kuvez de bîya pîl. Pêroyê cûya xo kuvez de vîyarîya. Hende pîr û pak menda.
Sara maya. Maya çar domanan a. Sara di lac di çênekê zaf delalî kerdê girs. Heya Sara û Mahmud pîya çar domanê delalî kerdê girs. Delal kerdê girs. Mahmud camerdo de cîya bî. Mahmûd seba ke pîzeyê domananê xo mird bikero, seba ke domanê xo biwanê, seba ke meşorê verê şêmiga kesî şîyêne teber xebetîyêne. Şîyêne Başur, Bakûr, şîyênê welatanê dûran…
Cîyatîya Mahmûd kerdena nê karan de nîya tabî. Xora camêrdê Kobanê zîyaderî şonê teber xebetînê. Kobanê bîya nêbîya tê de kar û xebat çîn o. Camerdî şonê teber xebetînê. Bi aşman, zîyaderîyê înan bi seran nênê. Halê Kobanê verê verkan de nîya yo. Cîyatîya Mahmûdî Mahmûd hûşk nêzdîyê Saraye nêbeno. Mahmûd mordemode demokratîk o. Tim wazeno Sara raver de şoro. Tenê bi karê çêyî, bi girskerdîşê domanan ra mûjil mebo. Wazeno Sara bibo cinîyade sîyasetmedar e, cinîyade zana ye.
Tawo ke Mahmûd teber der o, Sara Kobanê de kar û xebatê azadiya Kurdistanê kena. Hetkariya hevalan kena. Hevalan çêyê xo de hewênena. Înan rê mîlîstiye kena. Na hetkariya xo bi dil û can kena. Zerrî ra kena. Eke maya çar domana mebo Sara bîhna xo koyan de bicêro la domanan vileyê Sara girêdayo. Nêşkîna xo bierzo koyanê azad. Bi hesreta azadiya koyan bajarê xo de kar û xebate kena. Tawo ke na xebate kena nêşkîna xo zûlm û zordariya rejîmê Baas ra bixelesno ra. Sey xeylê welatperweran Sara kî êna tepîştene. Îşkenceya dewleta Baas ra derbaz bena.
Sara emrê xo bi têkoşîne vîyarnena. Sara hem barê çar domanan hem barê azadiya welatê xo dana serê hermanê xo û cûyena. Pêroyê renc û ezayê têkoşînê, xemê têkoşînê oncena. Tawo her şitlek welatê Sara ginenê hard ra zerriya Sara ra perçeyek beno ca. Sara têkoşîn a, têkoşîn Sara ya.
Sara derdin a. Sara çiqas cad kena derdanê xo medo teber la derdê Sara çareyê aye ra, çimanê aye ra, laşa aya rindeke ra xo danê teber. Sara verê ra zîyaderî mîyanê têkoşînê der a. Verê ra zîyaderî zemanê xo dana têkoşîna azadiya Kurdistanê, azadîya şarê xo, azadîya mordemîye. La Sara nêmcet a. Sara tamguzin a. Sara 25 Hezîrana 2015 ra nêmcet a. A roja kambaxe ra vileçewt a. A roje ra derdin a. Derdode giran zerrîya Sara weno. Sara tim xo ra vana ma gonîya ey a hende şitlanê welatê mi ra şîrînêr a? La reyna kî no derd cîya dejneno. No jan janode ciya yo. No jan hende gandar o, hende naso ke! Her vîste de bi Sara ra yo. Her vîste de!
Janê Mahmûdî! Dejê Mahmûdî. Roja ke Heramîyan fersend dî bî kewtîbî Kobanê bi hetkarîya xayînan. Bi hetkarîya cisnê Enkîdû, cisnê Harpagosî. A roje Mahmûd seba ke şarê xo bisevekno kewtîbî cengê heramiyan û ey cengî de şehîd kewtîbî. Mahmûdo ke cengê Kobanê de Kobanê ra nêvecîyaybî, çîyê pênêamaybî a roje koç kerd û şî. Şî û zerrîya Sara de venganîyade girse viraşte.
Jano girs, dejo girs na venganî ya…