Hemserokê Kongreya Komelê Demokratîk Hatîp Dîcle da zonayene ke dewlet her ke şino dekewna mîyanê kaosî. Dîcle aşkere kerd ke, serva-semedê vergirewtişê deklarasyonê KCD kaosî kena xorîn û vist vîrî ke çîyo ke dewlet rê gam bido eştiş, paştîdayîşê yewbînan û birabiyena şarê kurd û tirkan o.
Hemserokê KCD Hatîp Dîcle derheqê armancê weşênayîşê deklarasyonê KCD, projeyê xoserî û babetê zewbîna de ANF rê qesey kerd.
Dewlet ra çik nêpawê
Dîcle qalîkerdişê xo de vat ke lazim o heme sazîyê kurdan mîyanê rexnedayinî de bê û wina dewam kerd: “Rayberî no proje serra 2015’î de îlan kerd û pirtûkê xo de mîyanokê projeye awayo hera akerd. Finak-mînak nika averberdişê kurdîye rojdemî de yo û semedê ci zî hewcedariyê mektebê xemilnaye nêkeno, ma eşkenî her ca biaçarnî mektebe û lazim o, no babete de ma dewlete ra çik-teba nêpawî, bi xo bikerê. No semedê 9 xalê bîn ke Rayberî seba çareserîye vernîyaz kerdî zî vîyarteyo.”
Deklarasyon resneno pê
Hatîp Dîcle dergiya qalîkerdişê xo de ard ziwan ke, dewlete hetê weşî, zîraet, perwerde û sewbîna babetan de heqê şaran xesp kerda û wina domna: “Ma zî bi no deklarasyonî dewlete hişyar kenî û vanî ganî dewlete heqê şaran tepa bida. Armancê no deklarasyonî letekerdiş nîyo, eksê ci de pêresnayîş o; çi ke demokrasî xorayîrberdişê şarî yo. Ger ke dewlet qebûl nêka, encamê ci, do felaket bo û şar zirarekî pîl bivîno. Yanî dewlete qezenc nêkena la kurdî dê teqez qezenc bikerê. Lazim o dewlet bi ciddî nezdî bibo. KCD projeyekê Rayberîyo û ma zî hewl danî ke weşî ra heta perwerde û zîraetî ra heta aborîye, polîtîkayan aver berî.”
Projeyê tewr demokratîk
Dîcle ciresna ke no projeye reyde dewlete hetê demokrasîye de, do tayna hessas bibo û wina vat: “Heme karê komelî do komelî ra bêrî dewrkerdiş û no proje projeyê tewr demokratîk o. Projeyeka ke şar meseleyanê xo, bi xo nîqaş keno û çareser keno yo. Goreyê no proje, şar do bi azad xo rayvist bikero. Reyna-fina hetê asayişî de zî deklarasyonê ma zaf muhîm o û heme karê asayişî dewrkerdişê rayberîya heremî esas gêno. Nika AKP dekewta hewldayenê hêzkerdişê dewlet û hetta yeno vatiş ke na babete de qanûnî daxî yenî hedrekerdiş. No semedî ra zîhniyetê ma û AKP bi temamî eksê yewbînan o.”
Dîcle tewr peynî de veng da herkesî. Dîcle şarî pêhesna û va; “lazim o ma vengê xo berz bikerê. Dîcle vist vîrî ke, çîyo ke dewlet rê gam bido eştiş, paştîdayîşê yewbînan û birabiyena şarê kurd û tirkan o. Û peynî de va; Eke ma wina bikerê, ma êşkenî no lejî-herbî bidê vindernayîş. n ANF/AMED