Tirkîye û rejîma Baas amadekarîye kenê ke pîya hêrîşê herêma Şehba û Efrînî bikerê. bi no meqsedî, rejîma Baasî raya Helebî girot û ambargo rona. Dewleta Tirk zî tang, top, obûs ra pîya quwetê pîyade rişnay Ezazî.
Bado ke planê înan Reqa de nêamey ca, irkîye û rejîma Baas ê Sûrîye, xo amade kenê ke hêrîşê Efrîn û Şehba bikerê. Çekê giran ê ke Sûrîye ravêrnay zî Marea, Til Circir, Erşab, Exterîn û Ezaz de amey bica kerdiş.
Raya Heleb amê girewten
Tirkîye Ezaz û Mareayê de baregeh rona û rejîma Baasî zî dewa Nubul û Zehra de rayanê Heleb-Efrîn girot û ser Efrîn de ambargo rona. Çekê ke menzîla înan derg a û kirêşnîyay herem, seba bombardumankerdişê Efrîn yeno hesibnayen.
Şarê Efrîn û Şehba ke girotişê rayan rê nêrazîbîyayîş damûsnay û vistî vîrî ke înan wextê dorpêça ke 2012 ra heta 2016î dewam kerd de yardim da dewijanê Nubule û Zehra. Dewijan aşkere kerdî ke înan merdiş zî da ver çiman û yardimê xo resna ci. Dewijan vistî vîr ke dewleta Tirk waşt sereyê dewijanê Nûbul û Zehra bibirno, û persa ‘Se bi ke nika bîyê dostê pê û dişmenîya ma kenê’ kerdî?
Rûsya mîyanê Planî de ya?
Rûsya heta nika vera na rewşî helwest nêdamûsna. Goreyê çimeyanê heremî Rûsya zî mîyanê na planî de ya. Şaranê Efrîn û Şehba na rewşe zey peymana wertex yê Rûsya, Sûrîye û Tirkîyê hesibna û aşkere kerdî ke eke Rûsya na bêvengîya xo biramno, ê dê destûr nêdê ke Rûsya herêm de bimano.
SEYÎT EVRAN/EFRÎN