Vera faşîzmî her xoverdayîş heqdar o

Endamê Komîteya Perwerdeyî ya PKKyî Nurettîn Demîrtaşî derheqê prosesê peynî yê Tirkîya, Rojhelato Mîyanên û cîhanî de qisey kerd û hayr ant rijnayîşo ke taxê Sûr û sewbîna cayan de benî ser.

Nurettîn Demîrtaşî ard ziwan ke AKP karakterê xo yo faşîst Sûr, Cizîr û zaf bajar û qezayanê bînan yê Kurdistanî de nîşan da û wina va: “Dewlete nika vera xo daya nê waran û 2 sebebê nêyî estî; dewlete wazena vîrardiş û şopê xoverdayîşî orte ra werdarna û heto bîn ra zî cayanê tarîxî û kultirîyan taxrîb kena. Ma nika hêrişê faşîstan reyde rî bi rî yî. Her çiqas ke hêrişî hende zêde bîyî zî, şar sereyê xo nêtewêna. Dêsê tersî ameyî rijnayîş.” Demîrtaşî bale ant rayîrê vindarnayîşê nê hêriş û rijnayîşan ser û wina va: “Ganî ma xoverdayîşî bikerî malê komelî. ”

'Seba her kesî edalet'

Demîrtaşî qiseykerdişê xo de qala krîzo ke Tirkîya de esto û meşîyayîşê edaletî yê CHPyî kerd û wina va: “Faşîzm bi hawayo aşkere orte de yo. Artêşe nika bîya pîyonê AKP û MHPyî. Xora leşkerê ke yenî Kurdistan, tepîya nêagêrenî û îxtîmalê înan yê agêrayîşî çin o. Wina aseno ke fermandaro leşkerî qet tarîx ra ders nêgirewto. Her ke şono hîna zaf leşkerî mirenî û gelo erjê Erdogan û Bahçelîyî esto ke merdim seba înan bimiro? Labelê ecêb o; nêşênî vengê xo berz bikerî. PKK şarê xo paweno. Ganî leşkerî nêrî nê cayan û beşdarê şerî nêbî. Ewro her roje bi desan cenazeyî yenî û sebebê ci faşîzmê AKP û MHPyî yo. No proses de CHPyî meşîyayîşêkê bi nameyê ‘Meşîyayîşê Edaletî’ da destpêkerdiş. Labelê ganî nameyê ci bibîyêne ‘Seba her kesî edalet’. Heta ke berê Îmrali nêabî, edalet nîno Tirkîya. Ganî her hetan de vera faşîzmî de serewedaritiş bibo.”

Xoverdayîşo ortax

Demîrtaşî qala xoverdayîşê Akademîsyene Nurîye Gulmene û Mamosta Semîh Ozakçayê ke 100 rojî ra zêde yo ke grevê vêşanî de yî zî kerd û wina va: “Ewro vindetişê înan rûmetê akademîsyenan temsîl keno. Ganî merdim na çalakîye tena tepîya agêrayîşê karî nêgîro dest û wayîr bivejîyo. Çîyê ke vera keyeyê Ayşe Denîza ke Reqqa de şehîd kewte de ameyî kerdiş zî bêehlaqîyê girdî yî. Nê heme nîşanê ma danî ke faşîzmê AKP û MHPyî mîyanê bêtehamulîyêka girde yo. Çimkî seba ke potansîyelê roşnvîran çinî bikero, çi destê ci ra bêro, keno. Ewro hunermend, roşnvîr, rojnameger û sewbîna zaf kesî zîndan de yî. Vera faşîzmî de her xoverdayîş meşrû û heqdar o.” 

Kurdî heme herême tesîr kenî

Demîrtaşî derheqê krîzo ke Qatar de esto de zî wina va: “Yeno zanayîş ke demo ke Qatar de krîz estbî de Tahran de zî teqayîşî bîyî. Dima ra Hemleya Azadkerdişê Reqa dest pêkerde. Dêrazor de hêzê ke girêdayeyê Îranî yî, kewtî mîyanê têgêrayîşî. Her roje bi desan averşîyayîşê leşkerî û sîyasî benî. Rojhelato Mîyanên de her roje dengeyî bedilîyenî. Mîyanê nînan de yê ke tewr zirarin o, Tirkîya û koalîsyonê AKP û MHPyî yo. Sebebê ci zî o yo ke polîtîkayanê xo ser dişmenîya kurdan de awan kerdî, cok ra nêşênî sey verên bitesîr bibî. Nika kurdî rêxistinkerde yî û heme herême ser de tesîr kenî.” Demîrtaşî vist vîrî ke nika pozîsyonê Tirkîya, pozîsyonê kralîyetê ke vera Napolyonî de hewl dayênê xo bipawî maneno' û va: "Netîceyê Rojhelato Mîyanênî tena hêzê emperyalîstî nê, hişyarî û rêxistinîya şarî do dîyar bikero. Ewro çi Qatar, çi Erebîstano Siûdî û çi zî Tirkîya nêşênî Rojhelato Mîyanên de bibî hêzêko esasî. Êdî no cephe zî şeqîyeno.”

Çareserî Îmrali de ya

Demîrtaşî qala tecrîdo ke Rayberê Şarê Kurdî Abdullah Ocalanî ser de yo kerd û wina va: “Eke ma tecrîdo ke 2 serrî yo Îmrali de dewam keno, fam bikerî, o wext ma do bizanî ke do çi bêro kerdiş. Rayberîye vera faşîzm û qirkerdişî de xover da û no het de xoverdayîşê xo ra qet tavîz nêda. Nika ganî vindetişê ma zî xoverdayîşî ra tavîz nêdo. O ke gêrayîşê çareserî aver beno û do bîşêro Rayber Apo yo. Heme dinya nêyî zano; cok ra yê ke çareserî wazenî, zanî ke do kura de bigêrî. Yê bînî nizdîbîyayîşê sexte yî.”