Edîtorê Rojnameya Ozgur Gundemî Ahmet Bîrsîn vat ke çi heyf ke rojnameya Ozgur Gundemî ser her ke şono zilmê îqtîdarî zêdîyeno û wina vat: “Nika heqê verpirsîyarê mudirê nuştegehî, vilakerdox û mudirê weşanê ma de yew bi yew dozî yenî akerdiş û serekwezîrîye zî kartê ma yê zerdî betal kerd. Heqê ma de tena sûcdarkerdişê propogandaya rayvistişî nîno kerdiş, serekkomar, hezê dewlete û artêşî ra heqeret de doz yenî akerdiş. Çi bal o ke heqê ma de vengûvajo zûr viraştiş de zî doz yeno akerdiş. Demo ke yew sivîl yeno qetilkerdiş, no demî bi lezî walîyîye vana ke pêkewtiş vejîyayo la şahidê qewimyayîşî vanî ke înfaz ameyo kerdiş û ma no vengûvajî bi belgeyan virazenî la heqê ma de doz akenî.”
Bîrsîn destnîşan kerd ke taybetî heqê ma de îxlalkerdişê madeya 301’ine ya TCKe de doz yena akerdiş, ray beno yew roje de mudirê ma nuştegehî 10 ray îfade dano û wina domna: “Hewna çi bal o ke vengûvajê ekolojîk de demo ke nameyê Cengîz Holdîng bivîyaro bi lezî doza tazmînatî heqê ma de yena akerdiş û Wezaretê Dorûverî zî eynî hewa doz akeno. Vilakerdoxê ma yê rojnameye her tim hedefê polîsê AKPe û faşîstê MHPe de yî.
Tekoşîn do biramo
Bîrsîn polîtîkayê zilmî ke înan ser şuxilnayî ard vîr û îzeh kerd ke kanşopîya rojnameya Ozgur Gundemî esta û na kanşopî xoverdayîşo gird reyde domyena û wina dewam kerd: “Ma bi bawer î ke zey operasyonê qirkerdişî hewna do bêrî xebatkarê ma bigî, ya zî do kayyum tayîn bikerî la ma qet rojnamegerîya xo ra fek veranêdî, xoverdayîşê ma zî do bidomyo. Azadbîyayîşê yew komelî, girêdayeyê azadîya rojnamegerî yo. Çi heyf ke nika Tirkîya de rojnamegerî kerdiş zehmet bîyo, eke ma rojnamegerî vengê xo berz nêkerî do ma pîya têk şîrî.”
Wextanê peynî de zêdyayişê zextê dewlet yê vera çapemeniya azad hayr ancenê.
ARZU DEMÎR/ANF/STENBOL