KCDK-E vera tecrîdo girankerde ke Rayberê Şarê Kurdî Abdullah Ocalanî ser o yeno domnayene de prosesê çalakîyan dano destpêkerdene. KCDK-Eye dîyar kerd ke ê do mabênê 6 û 18ê teşrîna peyêne de prosesê çalakîyan danî destpêkerdene û kurd û dostê kurdan ra waşt ke wa herkes beşdarê çalakîyan bibo û destek bido çalakîyan.
Tecrîdo girankerde ke Rayberê Şarê Kurdî Abdullah Ocalanî ser o yeno domnayene, dewam keno. Vera tecrîdî de kurd û dostê kurdan qesawetin î û bitaybetî Ewropa de demêko derg o payan ser o yî û çalakîyanê tewir bi tewiran virazenî.
Dîvanê Hemserekîya Kongreya Komelê Demokratîke yê Ewropa (KCDK-E) zî derheqê çalakîyê ke bêrî viraştene de îzehetêko nuştekî da û îzehet de qala melumatanê çalakîyan da. Îzehetê KCDK-E bi vatişê ‘tecrîdo ke Rayberê Şarê Kurdî Abdullah Ocalanî ser o yeno domnayene, heme sînoranê ehlaqî û huqûqî derbaz kerdo’ derst pêkerdo û îzehet de bale ancîyayo etirîyayîşo ke weşî û ewleyîya Ocalanî ver esto ser.
KCDK-Eye îzehetê xo de dîyar kerdo ke ê na babete de tena dewleta tirkî nê, bêvengî û çinhesibnayîşê dewletanê Ewropa ke sîstemê tecrîdî de berpirsîyarîya înan esta, red kenî û wina dewam kerdo: “Birêz Ocalan Îmrali de girîya binê tecrîdî û dima ra vera kurdan de polîtîkayê qirkerdiş û îmhayî erzîyayî dewre. Nê her di yewbînan ra girêdaye yî. Tecrîd ra dima xeylê bajarê Kurdîstanî bi tanq, top û sîlehanê giranan ameyî rijnayene, ciwanê ma cêrzemînan de ameyî veşnayene û cenazeyê dayîkanê ma ziqaqan de ameyî verdayene. Reyna Efrîn de sîyasetê qirkerdişî ame domnayene. Dewleta tirkî tecrîd reyde heme ca de vera şarê ma de îmha, hêriş û çinkerdiş esas girewtî.”
Bêxera azadîye çîyêk çareser nêkeno
Îzehet de vera bêvengîya CPT û Mehkemeya Heqê Merdiman ya Ewropa (MHME) de reaksîyon ameyo nawitene û ameyo vatene ke dewleta tirkî na bêvengîye ra hêz gêna. KCDK-Eye dewamê îzehetê xo de wina vato: “Waştişê ma yo esasî azadîya Rayber Apoyî yo. Sewbîna çîyêk vernîya neheqî û bêhuqûqîyan nêgêno. Ganî Sîstemê Îmrali bêro vilakerdene û Ocalan azade bibo. Azadîya Ocalanî do vernîya zulm û şîddetê ke kurdan rê benî zî bigîro. O wext do Kurdîstan, Tirkîya û Rojhelato Mîyanên de çareserîya aştîye, azadî û demokratîke pê bêra.”
Vengdayîşê beşdarbîyayîşê çalakîyan
KCDK-Eye îzehetê xo de bale anto çalakîyê ke do mabênê 6 û 18ê teşrîna peyêne de bêrî viraştene ser û wina vato: “Ma veng danî heme dezgeh, şexsîyetê demokratîke yê Ewropa ke wa seba azadîya Rayberê Şarê Kurdî Abdullah Ocalanî bi hawayo aktîf beşdarê çalakîyan bibî û destek bidî çalakîyê ke mabênê 6 û 18ê teşrîna peyêne de do bêrî viraştene. Wa şarê ma û dostê ma zî têkoşîn berz bikerî û heta ke Rayber Ocalan azade beno, wa çalakîyî dewam bikerî.”
Çalakîyî do her roje bêrî viraştene
KCDK-Eye peynîya îzehetê xo de wina vato: “Mabênê 6 û 18ê teşrîna peyêne de do vernîya CPT û MHME de (Avenue de I’Europe 67000 Strasbourg) prosesê çalakîyê bêmabên bidîyo destpêkerdene. Wa no het de herkes bi ruhê seferberîye bixebitîyo. Wa nika şarê Kurdîstanî û dostê înan seba ke beşdarbîyayîş zêde bibo, bixebityî. Çalakîyî do her roje serê sibayî mabênê saetanê 10.00 û 17.00î de bêrî viraştene.”
ANF / BRUKSEL