Namzed û xebatkarê HDPyî çarçewaya xebatanê 24ê Hezîrane de sere de Şirnex, Mêrsîn, Edene, Denîzlî, Manîsa, Îzmîr, Osmanîye, Antalya û sewbîna cayan de şarî reyde ameyî têhet û destek waştî. Namzedan ra Kemal Bulbulî wina va: “Ma do seba ke ders bidî zaliman, 24ê Hezîrane zaf muhîm o. Yê ke qamanê Ehmedê Xanî, Roboskê û Orha Doganî rijnayî birayê ma nîyî. Ma nê zîhnîyetî red kenî.”
Weçînayîşê 24ê Hezîrane rê tena 12 rojî mendî û Partîya Şaran ya Demokratîke (HDP) seba ke xo biresno heme cayan, sere de bajarê Kurdistan û bajaranê bînan yê Tirkîya û Ewropa de lez dayo xebatanê xo.
Namzedê HDPyî mîyanê roje herçiqas ke hewa germin o zî esnaf û keyeyan zîyaret kenî, hula şanî zî bi kombîyayîş û akerdişê buroyan şarî reyde yenî têhet. Çarçewaya xebatan de Şirnex, Mêrsîn, Edene, Denîzlî, Manîsa, Îzmîr, Osmanîye, Antalya û sewbîna zaf cayan de xebatî ameyî kerdiş û şarî ra destek ame waştiş. Seba ke vizêr Şewa Qadîrî bîye, zaf cayan de mesajê yewîye û biratîye ameyî dayîş.
Qezaya Hezexî ya Şirnexî de cinîyî werdê fitarî ra dima vejîyayî rasteyan û vilawekî vila kerdî. Cinîyê ke bi cilanê xo yê herêmî û erbaneyan vejîyayî rasteyan, bi çepik û tilîlîyan rayîr şîyî. Kesê ke rayîr ra derbaz bîyî zî destek dayî.
EDENE
Bajarê Edene de namzedê HDPyî roje esnaf û keyeyan zîyaret kerdî û şewe zî bi kombîyayîşan şarî reyde ameyî têhet. Qezaya Yuregîrî ya Edene de akerdişê buroyî ame kerdiş û Namzede Tulay Hatîmogullari beşdarê akerdişî bîye. Hatimogullariye va ‘ma karker û kedkar î, ma do sîstemî bibedilnî’ û şarê erebî ra destek waşt.
MÊRSÎN
Qezayê Tarsus, Akdenîz, Yenîşehîr, Toroslar û Mezîtlî yê Mêrsînî de zî akerdişê buroyê weçînayîşî, kombîyayîşê şarî, komele, esnaf û keyeyan ameyî organîzekerdiş. Xebatan de siloganê ‘Ma HDP yî, ma ver bi meclîs’, ‘Ma do bi xoverdayîşî qezenç bikerî’ û sewbîna ameyî eştiş. Namzed Ridvan Turanî qezaya Akdenîzî de qisey kerd û wina va: “Welat de krîzê ekonomîke esto û berpirsîyarê ci hukmat o.” Heto bîn ra 7 serreyî ra heta 70 serreyî bi hezaran kesî beşdarê şahîya qezaya Tarsusî bîyî. Ciwanî bi meşaleyan rayîr şîyî û posterê Rayberê Şarê Kurdî Abdullah Ocalanî akerdî.
OSMANÎYE - ANTALYA
Bajarê Osmanîye de namzedê HDPyî qezaya Toprakkale de esnaf û welatîyan zîyaret kerdî û sewba HDP û Demîrtaşî rayî waştî. Antalya de zî qeraxê Konyaalti de standî abîyî û vilawekî ameyî akerdiş. Dima ra govende ameye girewtiş û turîstî zî beşdarê govende bîyî. Namzed Kemal Bulbul zî qezaya Kepezî de beşdarê şayîyêk bi û va ‘ma do roşanê dîyine 24ê Hezîrane de pîroz bikerî’ û wina domna: “Ma do seba ke ders bidî zaliman, 24ê Hezîrane zaf muhîm o. Yê ke qamanê Ehmedê Xanî, Roboskê û Orha Doganî rijnayî birayê ma nîyî. Ma nê zîhnîyetî red kenî.”
MANÎSA - DENÎZLÎ - ÎZMÎR
Cinîyê ke qezaya Şehzadelerî ya Manîsa de werdê fitarî de ameyî têhet, dima ra beşdarê şahîya taxa Ahmet Bedevîyî bîyî. Cinîyî fitarî ra dima weçînayîşê 24ê Hezîrane ser o munaqeşe kerdî. Bajarê Denîzlî de zî programê werdê fitarî ame viraştiş û 8 hezar ra zêde merdimî beşdarê werdî bîyî. Tîya de Namzedê Îzmîrî Nurettîn Turgayî qisey kerd û va ‘Yê ke merdiman goreyê dîn, cins û sewbîna cîya kenî, Quren ra fam nêkerdî’.
Bajarê Îzmîrî de zî hetê ciwanan ra werdê fitarî ame organîzekerdiş û xeylê kesî beşdarê werdî bîyî. Tîya de ame dîyarkerdiş ke seba qezençkerdişî ganî herkes bi hawayo baş bixebetîyo û 24ê Hezîrane roja ke peynîya îqtîdarê AKPyî ya.
MA/AMED