Xespbîyayîş û qayûm tayînbîyayîşê şaredarîyanê Amed, Wan, Mêrdîn, Pasûr û Qereyazî de hêrs û reaskîyonê Kurdan dewam kenî. Sere de Amed, Wan û Mêrdîn û sewbîna xeylê cayan de çalakîyê protestoyî dewam kenî.
Cinîya şehîdanê xoverdayîşê xoîdarekerdişî yê Cizîrî ra Sahîp Edînî Berîvan Edîna ke bi domanê xo yê 3 serrî beşdarê çalakîya Nobeta Demokrasî ya Amedî bena, seba xurtkerdişê têkoşînî veng daye.
Kurdîstan de domanî hema pîzeyê dayîka xo de şahidîya qetlîyam, xoverdayîş û têkoşînî kenê. Sahîp Baran Edîn zî nê domanan ra yew o. Sahîp hema ke pîzeê dayîka xo de bi, babîyê ci Sahîp Edîn xoverdayîşê xoîdarekerdişê Cizîrî de şehîd bi. Sahîp bi dayîka xo Berîvane 34 rojî yo ke Amed de abluqaya polîsan de çalakîya roniştişî de cayê xo gêno.
Ganî na bevêngîye biqedîyo
Berîvan Edîne vera qirkerdişê Cizîrî û polîtîkaya hêrişkarê ya dewlete ya vera Kurdan de dej û hêrsê xo nîşan dayî. Berîvan Edîne ajansê ANF ra Denîz Îkeyî rê qisey kerde û va ‘vengê Cizîrî nêdîya eşnawitene, herkes bêveng mend la ganî nika her cayê Kurdîstanî de Kurdî wayîrê îradeya xo bivejîye û vera dêsanê zulmî de vengê xo berz bikerê. No zulmo ke tîya de beno wa kes mevajo ke tena tîya de maneno. Siba do dora heme bajar û qezayanê Kurdîstanî bêro. Peynîya naye çin a. Ganî na bevêngîye bêro şikitene û herkes biwerzo payan ser. Vera nê zulmî de ganî vengê wayûbirayîye berz bo. Ma tîya de seba wayîrvejîyayîşê îradeya xo têkoşîn danê. Ma zulmî qebul nêkenê. Vizêr senî bi têkoşînî tecrîd ame şikitene ma do bi têkoşînî xespkerdişê qayûmî zî bişiknê.”
AMED