Qezaya Sûrî ya Amedî de Taxa Alîpaşa de rijnayîşo ke bi nameyê ‘Vurîyayîşê bajarî’ dîyaybî destpêkerdiş, dewam keno. Welatîyê ke banê înan keweno warê rijnayîşî, vera pêşnîyazê madî de vanî ‘wa awe û cereyanê ma nêbirnî, wa banê ma nêrijnî, ma hetkarîya maddî ya înan nêwazenî’ û reaksîyon nîşan danî.
Heta nika Alîpaşa de xeylê banî ameyî rijnayîş. Banê ke tehdîdê rijnayîşî înan ser de dewam keno, cereyan û awa înan yena birnayîş û ser înan de zextî benî. 10 rojî yo ke banê ke îxtîmalê rijîyayîşê înan esto, cereyanê înan ameyo birnayîş. Nê banan ra yewe zî banê keyeyê Ayata yo.
Bano ke kişta keyeyê Ayata de bî, ame rijnayîş û banê keyeyê Ayata ke rijîyayîşî qebul nêkerdbî zî ame rijnayîş. Ekîbo ke keyeyê Ayata rijnayî, keyeyî ra vatî “Pardon, ma nêzanayêne ke dêsê banan yew o.”
Taxijî bireaksiyon î
Keyeyê Ayata de 2 kesî astengdar î. Keye de Melek Ayata û Recep Ayata astengdar î, pî 23 serrî merdo, dayîke zî 8 aşmî verê merda. Meleke û Recep bano ke dayîke û pîyê înan ra mendo de cuyenî. Taxijî reaksîyon nîşanê rijnayîşê banî dayî û wina vatî: “Banî mîyan de eşyayê înan estbîy û rijnayîşê banî yeno manaya ke qestê canê merdiman kenî. Merdim nêşeno halîna mîlçikêk daxî birijno.Wexto ke merdimî banî mîyan de bîy, bi kepçeyan rijnayî. Do Homa nê zulmî înan rê nêverdo.”
AMED - DÎHABER