Texrîbatê Barajê Ilisû ke qezaya Heskîfî ya Êlihî de yeno viraştene, dewam kenî. Seba ke awe kom bikerî, vernîya qela û şikeftan ameyo padayene û eserê tarîxî yê herême kirişîyayî sewbîna ca. Herême de seba ke awe bêro komkerdene, çend şikeftê ke tarîxê înan bi hezaran serran o de dînamîtî ameyî teqnayene. Camî û qubeyê ci parçe parçe ameyî kiriştene û hesaban ra girîyayî binê temînatî.
Vizêr cayo ke sexlem mendbi de şewat vejîya. Ancax çend saetî ra dima mudaxaleyê şewatî ame kerdene. Şewat zî wareyo ke 6 hezar şikeftî tede estî de vejîya û bi saetan mudaxale nêame kerdene. Dima ra şewat hîra bi û tena wesayîtêkê hewnakerdişî erşawîya. Wesayîto ke ame zî nêşêna hewna bikero. Seba ke kewtiş û vejîyayîş qedexe yo, nîno zanayene ka çiqas zirar dîyo.
Heto bîn de Verfekê Komîsyonê Kultur û Hunerî yê Rêxistina HDPyî yê Stenbolî Mehmet Uçarî derheqê rijnîyayîşê Heskîfî de kayêk amade kerd. Kaya Uçarî hetê Alî Yildirimî ra Salona Tîyatroyî ya Bariş Mançoyî de ameye kaykerdene. Uçarî va ‘asîmîlasyon kulturan çin keno, labelê meseleya esile modernîteya kapîtalîste ya’ û wina domna: “12 hezar serrî tarîxê Heskîfî esto. Ewro beno bi hawayo asan bêro vatene, labelê no zaf muhîm o. Mîrasêko winasî seba barajêko ke 50 serrî emrê ci esto, yeno rijnayene. Ewro xeylê cayan de xeylê çîyî yenî viraştene û wexto ke şar îtîraz keno projeyî betal benî, labelê Heskîf de herçiqas ke Kurdî çalakîyan zî virazenî, viraştişê barajî dewam keno.
ÊLIH