2 serrî verê daristanê taxa Taylilelî ya qezaya Burhanîye ya Balikesîrî de şewatêko şaîbeyin vejîyabî. Şaredarîya AKPyî ya Burhanîye şewat ra dima 72 hezar û 520 metrekare erdî ser de dest bi viraştişê tîyatroyê amfî yê 5 hezar kesî kerde. Bedelê projeyî 5 mîlyon û 420 TL yo û kişta tîyatroyê amfî de viraştişê AVM û otoparkêk zî yeno plankerdiş.
Goreyê projeyî darê ke şewat de nêveşayî zî do bêrî birnayîş. Babete ser o Avûkate Fîlîz Sonsuza ke Verfeka Platformê Dormeyî yê Burhanîye (BURÇEP) ya, qisey kerde. Avûkate Sonsuze qiseykerdişê xo de va ‘nifûsê Burhanîye 57 hezar kes o, lazimîya Burhanîye bi tîyatroyê 5 hezar kesî çin a’ û wina dewam kerde: “Fikrê şarê qeza nîno girewtiş û şar nêwazeno ke AVM û otoparke bêrî viraştiş. Malîyetê projeyî zaf zêde yo. Heta ke fikrê şarî nêro girewtiş, xerçkerdişêko winasî raşt nîyo. Netîceyê nê projeyan de tebîet do bêro qetilkerdiş û herinda rindîya tebîetî de do AVM û otoparke bêrî viraştiş. Do çend hebî darî bêrî birnayîş? Nêyî merdiman bişik kenî.”
Tesîsî zirar danî tebîetî
Sonsuze hayr ant ziraro ke tesîsî danê tebîetî ser o û wina qedênaye: “Verê herême heme daristan bî. Çîyo ke ma pê dejenê qetilkerdişê tebîetî yo. Tesîsî zirar danî tebîetî. Merdim eşkeno herinda tesîsan de daran rono. Eke proje bêro viraştiş do herême biba erdêka wişke. Ganî no proje ra fek verabidî.”
DÎHABER/BALIKESÎR