Vera ambargoyo ke Kampa Mexmûrî ser o esto de çalakîya roniştişê ya Dayîkanê Aştîye roja 6. de dewam kena. Dayîkan waşt ke wa Kurdî vera hêrişan de yewîya xo awan bikerî û xoverdayîşê xo gird bikerî. Dayîka dîyar kerd ke wa demêko raver ambargo wedarîyo.
Roja ke vera endamanê îstîxbaratê Tirkîya de çalakîyêk ameye viraştene ra nata Kampa Mexmûrî ser o ambargoyêko giran esto. Ambargo 51 rojî yo ke dewam keno û PDK seba ke ambargo bêro wedarnayene çîyêk nêkeno.
Vera ambargoyî de heta nika xeylê çalakîyî ameyî viraştene û nînan ra yewe zî çalakîya dayîkan a. Seke yeno zanayene dayîkan çend rojî verê hewl daybî selahîyetdaranê PDK û hukmatê Başûrî de pêvînayîşêk bikerî, labelê dayîkî raştê heqaret û hêrişê pêşmergeyan ameybî. Dayîkan zî vera hêriş û heqaretê pêşmergeyan de çalakîya roniştişî daybî destpêkerdene.
Dayîkê Aştîye vera ambargoyî de çalakîya roniştişî daybî destpêkerdene û çalakîye 6 rojî yo ke dewam kena. Fadîle Toka ke seba wedarnayîşê tecrîdê serê Rayberê Şarê Kurdî Abdullah Ocalanî 127 rojî grevê vêşanîye de mende zî çalakîye de ya.
Wa cinîyî bivejyî raşteyan
Toke va ‘ganî Kurdî no proses de yewîya xo awan bikerî’ û wina dewam kerde: “Dewleta Tirkî wazena Rojawanî dagîr bikera. Reyna artêşa Tirkî bi hemkaranê xo Başûr dagîr kena. Wazenî estene û raştîya Kurdan wedarnî. Ez veng dana Parlamentoyê Herême yê Kurdîstanî ke wa reaksîyon nîşan bidî. Ê ke wayîrê wijdanî yo, ganî vera hêrişanê dagîrkeran de bivindero û wayîrê şeref û namûsê xo bivejîyo. Ganî Kurdî vera hêrişan de bi awankerdişê yewîya xo cewab bidî. Ez veng dana heme cinîyan ke wa bivejyî raşteyan û xoverdayîşê xo gird bikerî.”
Heta ke netîce bigîrîyo ma do çalakîya xo bidomnî
Dayîkan ra Cemîle Korkmaze daye zanayene ke 51 rojî yo ke kampa înan ser o ambargo esto û wina va: “Heta nika ambargoyî ver 2 cinîyî bebekê xo vînî kerdî. Nêweşê ke ganî bişîyênê Hewlêr, destûr nêdîyeno înan. Heta nika xeylê çalakîyî ameyî viraştene. Labelê ti netîce nêame girewtene. Ma dayîkî zî seba ke biresî hedefê xo ma çalakîye daye destpêkerdene. Çalakîya ma 6 rojî yo ke dewam kena. Heta ke ma biresî hedefê xo, ma do çalakîya xo bidomnî.”
Tena destûr nêdîyeno şarê kampe
Dayîke Aştîye Yildiz Çomleke zî wina va: “Çalakîya ma 6 rojî yo ke dewam kena. Heta nika selahîyetdaranê Hukmatê Başûrê Kurdîstanî ra ti kesî cewab nêda waştişê ma. Destûr nêdîyeno wendekar, karker û nêweşî derbasê Hewlêrî bibî. Destûr dîyeno herkesî, tena destûr nêdîyeno şarê kampe. Ma nêzanî ke çira rayîrî padayo? Ma vanî ma birayê yewbînan î, labelê ê wina nêfikirîyenî. Şîyayîşê ma yê Hewlêrî çi zirar dano înan. Ma wazenî ke wa ambargo bêro wedarnayene.”
ROJNEWS / MEXMÛR