Rêxistinê elewîyan ke girêdayeyê Federasyonê Elewî Bektaşî (ABF) yî û Komeleya Elewîyê Demokratîke (DAD) do bi rayberîya Egîtîm Senî de qezaya Kartalî ya Stenbolî de 17ê êlule de mîtîngêkê organîze bikerî.
Seba viraştişê mîtînge amadekarîyî dewam keno. Seba mîtînge zaf bajaranê Tirkîya de kombîyayîşî virazîyenî. Babete ser o Îdarekarê Cemxaneyê Mêrsînî û DADî qisey kerdî.
Sekretera Cemxaneyê Mêrsînî Nuran Engîne va ‘bi dersê dînî yê mecbûrî destpêkerdişê serra perwerdeyî nîno qebulkerdiş’ û wina dewam kerde: “Mufredato newe yê dersê dînî, bawerîyanê cîyayan çinî hesibneno û dînê serdestî dano ferzkerdiş. Mufredat de cîhad sey îbade nawnîyeno, ca dîyayo mefhûmê cin, turban û mareyê îmamî û sewbîna. No nîno qebulkerdiş; bê destûra ma nêşênî şerîatî bimusnî domananê ma. Ma wazenî wa heme canî beşdarê mîtînge bibîy.”
Ma veng danî herkesî
Îdarekara DADî Songul Aydine zî va ‘ma sey cinîyî elewîyî wazenî wa no mufredat tepîya bêro antiş’ û wina domnaye: “Ma perwerdeyo ke domanê ma eşkenî bi hawayo azad xo îfade bikerî û mesleqêko wazenî pê bikerî, wazenî. Ma cinîyî vanî ke wa ameyoxa domananê ma reyde kay nêkerî. Cok ra ma seba beşdarbîyayîşî veng danî herkesî.”
DÎREN KESER / PÎRHA - MÊRSÎN