Dayikê aştî yê Silopîya seba yewîya neteweyî ya kurd veng day û aşkere kerdî ke eke kurdî nêbê yew, dê ti wext kaosê Rojhelatê Mîyanîn ra nêxelesîye. Dayikan vistî vîrî ke bi serrano ke şarê kurd seba serbestî û demokrasî têkoşîn danê, la wexto ke nêbê yewe ti maneyê na têkoşîn çin a.
Dayikan ra Emîne Orûç, ard ziwan ke Rojhelatê Mîyanîn zey çiravêk a û vist vîrî ke şarê kurd mîyanê deryaya lincî de têkoşîn dano. Orûç va “Eke ma nêwazenê bifetisê û wazenê deryaya lincî ra bivejyê, ganî ma bibê yewe. Emîne Orûç hayr ant muhîmîya yewîye ser û da zanayîş ke xelesnayîşê kurdan bi yewbîyayîşî mumkun o. Ganî ma nayî fehm bikerê û bidê fehmkerdiş.
Destê xo lincî ra biance
Dayik Emîne Orûç waşt ke Serokê Herêma Kurdistana Federe Barzanî goş bido vengdayîşanê yewîya neteweyî yê KNK û wina dewam kerd: “Ez veng dana Barzanî. Wa hinî destê xo na lincî ra bianco. Wa destê xo bido şarê xo. Wa na sîyaseta xo ya qilêrîn ra fek verado. Kesê ke dişmenîya kurdan kenê wa hinî fehm bikerê ke komkişten, tecawiz, tepiştiş, zext û girotişî çare nîyo. Wa hinî Barzanî verê xo açarno na têkoşînî.”
Barzanî tenya temaşe kerd
Dayika aştî Zenep Begenîr zî vist vîrî ke çeteyê DAIŞ seba ameyoxê netewan nêweşîyêka janî ya û wina qisey kerd: “Ganî hinî Barzanî seba yewîya neteweyî gamêk bierzo. Wa dişmenîya xo ya Kurdistanî verado. DAIŞ zey nêweşîyêka janî day bedenê Kurdistanî. Teba nêmend ke bîro sereyê ma ser. La Barzanî tim temaşe kerd. Ti vanê ez kurd a, la Şengal de to dişmenîya tewr gird yê kurdan kerd.”
‘Kobanî bi gonî ronîya’
Begenîr vist vîrî ke şarê dinya şahîdîya têkoşîna serbestî û xoserî yê kurdan kenê la Barzanî 3 meymûnan kay keno û wina va: "Barzanî, hinî paştê xo me de şarê kurd, verê xo açarne ci. Hinî ti û Erdogan nê kerdenanê xo ra fek veradê. Ma tim va yewî. Wa hinî Barzanî seba yewî û birayîye gamêk bierzo. Ma Kobanî bi gonî rona. Nika zî hêrîşê Efrînî kenê.”
Heta ke ma nêbê yew ma sernêkewnê
Dayikan ra Besna Ozturk zî dîyar kerd ke kurdan ne şer ne zî gonî waşt, eksê ci de dawaya aştî kerd. Ozturk va, wexto ke şerî çormeyê ma girot de zî ma pes nêkerd û qiseyanê xo wina qedêna: “La, heta ke ma nêbê yew ma dê sernêkewê. Seba ke dinya ma bisilasno û zey îradeyekê bivîno na raştîyêka ke nêbo nêbeno ya. Raşt o, bi serran o ma têkoşîn danê. Eke ma yewîya xo viraştiba, ma do rewna ra netîce girotiba.”
ŞIRNEX