Wa bibo bingeyê yewîye

Vera hêriş û dagîrkerîya dewleta tirkî ya Başûrê Kurdistanî de çalakîya tirsê ganîye ya ciwanan roja 22. de dewam kena. Çalakgêran ra Ahmet Germîyanî reaksîyon nîşan da û wina va: “Wa vindetişê ciwanan bibo bingeyê yewîya neteweyî û wa kongreya neteweyî pê bêro.” Hunermend Nasir Rezazîyî zî dîyar kerd ke ê ancax bi yewîya neteweyî eşkenî vera dagîrkerîye de bivinderî.

Her ke şono vera hêriş û dagîrkerîya artêşa tirkî ya vera Başûrê Kurdistanî de reaksîyonî zêde benî. Heta nika vera dagîrkerîye de xeylê çalakîye û protestoyî ameyî kerdene û nê çalakîyî her ke şono vila benî.

Vera hêriş û dagîrkerîya artêşa tirkî de ciwanan 8ê Hezîrane de çalakîya tirsê ganîye daybî dest pêkerdene û çalakîye roja 22. de dewam kena. Çalakgêran ra Ahmet Germîyanî qisey kerde û dîyar kerde ke vindetişê ciwanan wa bibo bingeyê yewîye.

Germîyan eynî wextî de Rojawan de Xoverdayîşê Kobanê, Serêkanîyê û Koyê Kezwanî de zî cayê xo girewto. Germîyanî va ‘hêrişê ke vera Kobanê, Kerkûk û Efrînî de bîyî, dewamê Komploya Mîyanneteweyî yî’ û wina dewam kerd: “Nika zî wazenî na komplo ser Başûrê Kurdistanî ra bidî domnayene. Ma seba ke na komploye veng bivejî, ma çalakîya tirsê ganîye daye dest pêkerdene.”

‘Ma bi kêfweşî canê xo danî’

Germîyanî qiseykerdişê xo wina qedêna: “Wa hetê kurdistanî vera dagîrkerîye de bivinderî. Ganî hetê sîyasî yê kurdan mabên de nêmanî. Bêvengîye yena tesdîqkerdişê dagîrkerîye. Wa hetê sîyasî nizdîbîyayîşê xo newe ra çimî ver derbaz bikerî. Wa vindetişê ciwanan bibo sebeb pêardişê kongreya neteweyî. Çimkî ma ancax bi yewîya neteweyî eşkenî vera koyanê Kurdistanî bipawî. Rejîmê Sedam Huseyînî, Îran û Sûrîye qet estena kurdan înkar nêkerdî. Labelê Erdogan estena kurdan înkar keno û vera kurdan de dişmenî keno. Ma nêvanî wa dişmen nêro, eke wazenî wa bêrî. Ciwanî tîya de yî. Ma tîya ra ancax bi hawayo şehîd vejîyenî. Ma seba welatê xo bi kêfweşî canê xo danî.”

Rezazîyî seba yewîye veng da

Babete ser o hunermend Nasir Rezazîyî qisey kerd û vera dagîrkerîye de reaksîyon nîşan da. Rezazîyî dîyar kerd ke donemêko winasî ke tede hêrişê girdî benî de ganî kurdî yewîya xo awan bikerî. Rezazîyî va ‘ganî heme partî, sîyasetmedar û sewbîna vera hêriş û dagîrkerîya dewleta tirkî de bibî yewe’ û wina domna: “Şarê kurdî ancax bi yewîya neteweyî eşkeno cewab bido na dagîrkerîye.”

Ganî ma destûr nêdî dagîrkerîye

Rezazîyî qiseykerdişê xo de bale ant ser nizdîbîyayîşê dewleta tirkî ser û wina va: “Efrîn, Kerkûk û referandûmî ra dima ganî hetê sîyasî yê kurdan, êdî rîyê dewleta tirkî ya raşt bivînî. Hêrişê peyên yê Îran û Tirkîya nîşan dayî ke ganî kurdî têhet de bibî. Wa herkes vera hêriş û dagîrkerîya dewleta tirkî de çi destê ci ra yeno, wa bikero. Ganî kurdî çar parçeyê Kurdistanî de vera dagîrkerîye de bivinderî. Lazim o ma vernîya dagîrkerîye bigîrî û destûr nêdî dagîrkerîye.”

MERKEZÊ XEBERAN