Koordînasyonê Komalên Ciwanî îzehetêko nuştekî da û îzehetê xo de wina va: “Dewleta tirk netîceyê têkşîyayîşo ke vera şarê kurdî de cuyaya, nika donemê xo yo tewr zeyîf cuyena. Seba ke tersê çinbîyayîşî kewto zerrîya înan hende bi hawayo wehşî hêrişê şarî kenî”

15 rojî yo ke dewleta tirk dewê Xerabê Bava û Talatê yê qezaya Nisêbînî ya Mêrdînî de şarî ser de zulm, îşkence û qirkerdiş virazena. Heta nika yeno vatiş ke tewr kêmî 5 kesî hetê hêzê dewleta tirk ra ameyî qetilkerdiş û wehşeto ke hetê hêzê dewlete ra yeno kerdiş, domîyeno.Koordînasyonê Komalên Ciwanî babete ser o îzehetêko nuştekî da. Koordîsyonê Komalên Ciwanî îzehetê xo de vato ‘no zîhnîyeto faşîst û dagîrker seba şarê Kurdistanî qirkerdişî ra vîşêr çîyêk nêfikirîyeno’ û îzehet wina dewam kerdo: “Îzehetê selahîyetdaran ra yeno famkerdiş ke no wehşet do bidomîyo. Vera nê qetilkerdişan de bêvengmendiş do cesaret bido dewleta tirk. Ganî ciwanî vera zulm û qetlîyamê dewleta tirka ke şert û mercanê zimistanî goreyê menfîetê xo şuxilnena û hêriş kena de bivinderî û qebul nêkerî.” 

Hêrişî do zêde bibî 

Dewamê îzehetê Koordînasyonê Komalên Ciwanî de wina ameyo vatiş: “AKP û blokê faşîstî planê qirkerdişî de bîyî ortax û no konsept weçînayîşê 7ê Hezîrane ra dima kewto dewre. Nê polîtîkayî netîceyê averşîyayîşê sîyasî yê rojane nê, stratejîya ortaxe ya hêzanê dewlete yê faşîstan î. Çarçeweya nê polîtîkayan de ewil hêrişê bajaranê ma kerdî, nika zî hêrişê dewanê ma kenî. Eke ma vera nê hêrişan de bêveng bimanî, o wext do nê hêrişî zêde bibî.”

Ganî gird bibo 

Îzehet de ameyo vatiş ke ‘çeteyê ke bin nameyê SADATî de ameyî têhet, seba qirkerdişî kom bîyî’ û îzehet wina domîyayo: “Netîceyê referandûmî se beno wa bibo, no blok do şero mîyanên bivejo. Ganî ciwanê kurdan nêyî bivînî û goreyê ci hereket bikerî. Ganî bi serewedaritiş û çalakîyan vernîya hêrişan bêro girewtiş. Vera nê hêrişanê topyekunan de ganî ma zî çalakîyanê xo reyde rêxistinîya xo gird bikerî.”  

Wa ciwanî cayê xo bigirî

Peynîya îzehetî de wina vajîya: “Nê hêrişî seba ke dewleta tirk bihêz a nê, seba ke zeyîf a benî. Dewleta tirk netîceyê têkşîyayîşo ke vera têkoşînê 40 serran yê şarê kurdî de cuyena de ameya duştê rijîyayîşî. Bi serran o ke ma bi  kede û zehmetîyanê girdan têkoşînêk danî û nika ma ameyî demê netîcegirewtişî. Cok ra ganî ciwanê kurdî demê netîcegirewtişî de zî bi hawayo aktîf cayê xo bigirî. Ganî ciwanê kurdî vera wehşetê dewlete de bêveng nêmanî û reaksîyonê xo nîşan bidî.”  


BEHDÎNAN