Artêşa Tirkî 3 rojî verê Serêkanîyê de sîvîlan hedef girewtbî û xeylê sivîlî merdbî û bi desan sivîlî zî birîndar bîbî. Sîvîlê ke merdî mîyan de 2 rojnmagerî zî estbîy. Komîteya Pawitişê Rojnamegeran (CPJ) ke merkezê ci New York de ya, îzehetêk da û hêrişê dewleta Tirkî şermizar kerd.
Komîteye vato ‘teyarayan konvoyêkê sivîlan hedef girewto û netîceyê hêrişî de 2 rojnamegerî merdî 3 rojnamegerî zî birîndar bîyî’ û wina dewam kerdo: “Ma hedefgirîyayîşê sivîlan ver etirîyenî. Ganî hêzê mîyanneteweyî goreyê heqanê mîyanneteweyî têbigêrî û sivîlan hedef nêgirî. No hetê huqûqê mîyanneteweyî ra ameyo qedexekerdene û çarçewaya sucanê şerî de yo.”
Îzehet de ameyo vatene ke rewşa peyêne ya Sûrîye hetê Ekîbê Mudaxaleyê Rewşa Lezgîne ra nizdî ra yeno taqîbkerdene. Heto bîn de Alan Roj û Dilşad Cûdîyî derheqê hêrişî de melumat dayo Komîteya Pawitişê Rojnamegeran ya Mîyanneteweyî û dîyar kerdo ke rojnamegerê herêmî û mîyanneteweyî zî mîyanê konvoyî de bîyî. Komîteye da zanayene ke dewleta Tirkî verê cû zî rojnamegeran hedef girewto û ganî êdî fek nê kerdişanê xo ra verado.
ANHA / QAMIŞLO