Taxê Alîpaşa û Lalebeyî yê qezaya Sûrî ya Amedî de Merhaleyo 1. yê rijnayîşî qedîya û taxan de bingeyê bînayê ke do bêrî viraştiş ameyî eştiş. Taxijî bi hawayo etirîyaye rijnayîşî temaşe kenî. Nîno zanayîş ke merhaleyê 2. û 3. do kamcîn wext dest pêbikerî.
Heto bîn ra nika zî dewlete vera xo daya Fîskayaya ke girêdayeyê qezaya Yenîşehîrî ya û seba ewja zî qerarê îstîmlaqî girewte. Çarçewaya Fîskaya de taxê Dîcle û Ferîtkoşku yê ke sînorê Lîsteya Mîrasê Dinya ya UNESCO de ca gênî zî sey ‘waro rîskin’ ameyî îlankerdiş. Eke Fîskaya de rijnayîş dest pêbikero, o wext do 12 hezar merdimî ca û warê xo ra bibî. Kesê ke rijnayîş ra tesîr bibî, înan ra yewe zî Dapîra Sidika Alkana 90 serreyî ya.
Alkane seba ke ti kesê aye çin o, bi hetkarîya cîranan cuya xo domnena. Alkane vana ‘ti kesê mi çin o, eke rijnayîş dest pêbikero ez nêşêna şêra cayêkî’ û wina dewam kerde: “Ez bi tena sereyê xo cuyena. Eke mi tîya ra bivejî, cayo ke ez şêra çin o. Êdî bes o, bajarê ma heme rijnayî. Wa mi tîya de defin bikerî, la wa mi tîya ra nêvejî.”
Ez wazena tîya de bimira
Alkane va ‘heta nika qet zulmê dewlete kêmî nêbîyo’ û wina dewam kerde: “Dewlete bi serran o zulmê ma kena. 27 serrî verê seba ke dewa ma Êlih de veşnaybî, ez ameybîya tîya. Seba ke domanê mi çinêbî, mêrdeyê mi destek dayêne mi. Wexto ke mêrdeyê mi merd, ez tena menda. Nika cîranê mi sey keyeyê min î. Labelê dewlete wazena ma keyeyanê ma ra biveja. Ez wazena tîya de bimira. Wa dewlete fek zulmî ra verabido.”
ANF/AMED